Блогер журналист нек тюйюлдю

Бу соруу бла байламлы даулашла дайым чыгъа тургъанлары себепли, мен да алагъа къатышыр умутлума. Кётюрюлген тема мени кесиме да сейирди, дейди белгили журналист Владимир Познер «Российская газетагъа».

Алай бла соруу былай салынады: «Блогер – ол журналистмиди, сора Интернет бла тюрлю-тюрлю информация излеу системала асламлы информация органлагъа саналамыдыла?» Мен оюм этгенден, анга жангыз да бир тюз жууап барды – угъай. Алай нек айтханымы уа бусагъат ангылатайым. Биринчи, блогерден башлайыкъ.

Ол журналист болмагъаныны баш сылтау - блогер энчи усталыкъ тюйюлдю. Алай бла формальный жаны бла анга журналист дерге жарамайды. Экинчиден а, аны бир тюрлю жууаплылыгъы жокъду – ол не сюйсе да, аны жаза береди. Анга шартланы тинтирге, аланы тюзлюклерине бла терсликлерине къараргъа керек тюйюлдю. Анга, журналистгеча, жууаплылыкъ салынмайды.

Былайда журналистлени араларында уа ётюрюк жазгъанла, болумланы юслеринден тынгылы билмей басмагъа не эфирге бергенле жокъмудула, дерикле да чыгъарыкъдыла. Хау, алайды. Алай ала журналист шартларын тас этгендиле, эм уллу жарсыу да андады. Ала жорукъланы эсге алмагъан хирургла кибикдиле. Алай этген хирург а врачлай къаламыды? Мен блогерге сёгюн салмайма. Жангыз да аланы бла журналистлени ишлерин айырыргъа керекди. Кеслерин башда айтылгъаныча жюрютген журналистле усталыкъларына тамгъа саладыла. Блогерлеге уа алай этмеклик заран келтирмейди.

Асламлы информация органланы юслеринден айтханда, ала къыралны законларына сыйыныргъа тийишлидиле. Олду аланы Интернетде бола тургъан затладан айыргъан.

Дагъыда бир зат. Бир-бир блогерлени бла сайтланы адамла артыкъ окъугъанларыны сылтауу журналистлени, асламлы инфрмация органланы, бир кесегинден къалгъаны, бу атха тийишли болмагъанларындады. Аны ючюн окъуучу кертиге ушагъан шартланы, кесини оюмун да айтырча жерни излерге кюреше, сетьни жанына бурулады. Аны бла байламлы эсиме Линкольнну сёзлери келедиле: «Кёп заманны ичинде халкъны гитче бир кесегин алдатып турургъа неда бир кесек заманны халкъны аслам кесегин алдатып турургъа боллукъду, алай сау халкъны кёп заманны терс жол бла элтип турургъа уа онг жокъду».