Газет окъуучуну оюму

«Энтта да сейир хапарла сакълайбыз»

Малкъар газет не заманда да эсли адамларыбызны ёхтемлиги болгъанды. Ол къыралны, республиканы жашауундан толу хапар береди бизге. Ахшы адамларыбызны юсюнден, тарых жолларыбыздан а къаллай бир материал бла шагъырей этеди! Хар бир миллет да ёхтемленаллыкъ тюйюлдю быллай басма органыбыз барды деп. Мен анга бек къууанама. Бизни юйюр газетни бир номерин да къоймайбыз окъумай.

Заман бара-баргъаны сайын хар не да тюрленеди. Социалист система бузулгъанлы, тау эллени жашау халлары да тюрленнгендиле. Алай а къырал элден башланады, аны унутургъа жарамайды.  Баям, ол кертиликни эсге алып,  окъуучуланы ыразы этерге да сюйюп, редакцияны ишчилери  тау эллеге барып, анда жамауатха тюбеп, аны оюмларына тынгылап, аны юсюнден билдиредиле бизге.

Ол тёреге айлана тургъан иш – тау эллени бюгюннгю жашауларыны юсюнден жазып башлагъаныгъыз иги шартды. Алда Хабаз, Кичибалыкъ эллени юсюнден окъугъанбыз. Бу жол а газетни 17  августда чыкъгъан 98-чи номеринде Кёнделенни юсюнден бек тынгылы материалла берилгендиле.

Кесим кёнделенчи болгъаным ючюн да болур, аланы бек сюйюп окъугъанма. Элими бу къыйын жашауда бетин ариу сакълагъанына къууаннганма. Бу уллу иш ючюн газетни баш редактору Къонакъланы Хасаннга, ол жазыуланы авторлары Мусукаланы Сакинатха бла Улбашланы Муратха да ыразылыгъымы билдиреме.  Тутхан ишигизде жетишимли болугъуз. Энтта да быллай сейир номерлеригизни сакълайбыз.

Тёппеланы Шаухал,
Элбрус районну пенсионерле союзуну председатели, Тырныаууз шахар.

«Жарсыулагъа эс бургъаныгъыз ючюн ыспас этеме»

«Заман» газетни 4-чю августда чыкъгъан 93-чю номеринде Мусукаланы Сакинатны «Эс бурурча болумла уа кёпдюле…» деген материалын окъугъандан сора, кёп сагъыш этгенме. Анда айтылгъан затла бары да тёрели болуп баргъанларына жарсып, андан жазама.

Юйюр къурау, сабий ёсдюрюу – ол затла халкъыбызны ёмюрле теренинде юзюлмей барлыгъыны шагъатлыгъыдыла. Анга энчи эс бурургъа кереклисин ангылагъан бла чекленип къалмай, къайсы бирибиз да ол затны юсюнде къолубуздан келгенни этерге керекбиз. Алай болмаса, газет, журнал да, аны къой, ана тилибиз да керек болмай къаллыкъдыла.  Хар бир таулу элде юйдегиленмеген жаш адамланы санлары кёпден-кёп бола баргъан болмаса, азамайды.

Бюгюн миллет къайгъысын андан башларгъа керек сунама. Бу затха эс бургъан, жарсыгъан  адамланы бирге жыйып, мадар излерге керекбиз. Барыбыз да билгенден, бир ненча таулу жамауат биригиу барды. Ала, бир бири бла  тарт-соз этип турмай, быллай, халкъыбызгъа керекли ишлеге да бёлюнселе иги эди. Дагъыда культура эм тарых фондла ишлейдиле, миллетге билеклик этерге сюйюп. Ала быллай магъаналы жумушлагъа бирден эс бурсала иги боллукъ эди. Бирлик, ангылау да керекдиле бу болумда бизни барыбызгъа да.

«Къызла эрге нек бармайдыла?» – десенг, элледе жашаргъа сюймейдиле бир-бирлери.  Бусагъатда элде шахардан не жаны бла да игиди: химия ашны (бройлер тауукъла, жалгъан ашла, сютбашдан башлап) орунуна табийгъат берген, жюз жылла бла жашагъан ата-бабаларыбыз татхан аш-суу, таза хауа, шахарда болгъан таплыкъла. Акъыллыла андан излейдиле тау элледе юйле. Бизникиле уа андан къачадыла.

Жашланы да барды сылтаулары – иш жокъду. Къалай жокъду?! Мал бла кюреширге нек жарамайды, таулу элде туруп? Ата-бабаларыбыз малчылыкъ бла кюрешгендиле. Тёгерекде тау бетледе малла жайылып, къаллай берекет болгъанын унутмагъандыла кёпле. Бусагъатда уа, сау кюнню атха минип барып турсанг, «Салам алейкум!» – дерге адам табарыкъ тюйюлсе. Жайлыкъла эркин, онг бар. Сора нек онг эталмайбыз кеси кесибизге?

«Заман» газет халкъыбызны быллай жарсыуларына энчи эс бургъанын, аны юсюнден жамауатда не оюмла болгъанларын басмалай тургъанын тюзге, бек керекли ишге да санайма.

Жаппуланы Магомет,
Лашкута эл.