Ахшы умутла бла кёлленип

Августда жаланда таулула угъай, битеу Кавказ да Отарланы тукъумларындан эки жаш адам – Алим бла Марина – башлагъан «Отар 200: бирликни тёппесине чыгъаргъа заман» деген проектлерин жашауда бардыргъанларына Инстаграмда онлайн халда  «Отар тукъум» бетде къарагъанды. Анга кёре жаш адамланы къаууму Минги тауну тёппесине чыгъаргъа керек эди. Болгъанды ол огъурлу иш!

Быйыл  поэтле Отарланы Керимге 110 жыл, Саидге  120 жыл, жырчы Омаргъа 105 жыл толады. «Биз, жаш тёлю, тукъумубузгъа атагъан проектибиз бла таматалагъа сый берирге, кёчгюнчюлюкде ёлген адамларыбызны эсгерирге сюе эдик», – дегенди Отарланы Алим.  

Он жаш адам Минги тауну башында Отарланы белгили адамларына, битеу тукъумгъа, миллетибизге атап, «Минги тау» жырны жырлагъандыла. Бу огъурлу иш озгъан ёмюрле бла бюгюннгю кюнню бирге байлагъанды, битеу барыбызны да жюреклерибизни жарыкъ умутладан толтургъанды. Жаш къауумгъа таматала не жаны бла да болушхандыла: кёллендиргендиле, жол къоранчларын да боюнларына алгъандыла, аланы араларында Отарланы Керимни къызы, «Керим»  фондну таматасы  Римманы, дагъыда  Амашны, Махтини, Исмайылны, Мухтарны эм башхаланы болушлукъларын белгилерге боллукъду. «Эльбрусоид» фонд да къошумчулукъ этгенди.

«Халкъ тукъумладан къуралады, - дейди Алим. – Хар тукъумну ичинде бирлик болса, бир бирлерине болушсала, миллет да кюч аллыкъды. Таулула кёчгюнчюлюкню къыйынлыгъын бир бирлерине билеклик этгенлери бла кётюралгъандыла. Бусагъатда жууукъланы араларында байламлыкъ къарыусуз бола барады, ол а халкъны кючюн урлагъан жарсыулу ишди. Бирлеширге заман жетип турады».

Марина малкъар тилде бек ариу сёлешеди. Бусагъатда Москвада жашайды, сабийлик жылларында  алгъа Кёнделенде, артда уа Тырныауузда школда окъугъанды, малкъар тилден бла литературадан дерследе миллетибизни культурасын терен билгенди. Алай бусагъатда ол дерслени саны  азайгъанына жарсыйды. Кертиси бла да, шёндю шахарлада угъай, тау элледе окъуна ана тилибизни билмеген сабийлени саны ёсюп барады. «Мен тукъумуму бек сюеме, биринчи кере Минги таугъа интернационал къауум бла баргъанымда, Отарланы белгилерин чыгъаргъан эдим ары», - дейди ол. Къыз социальный сетьлени хайыры бла жарыкъландырыу ишни бардырыргъа жангы амалла чыкъгъанларын чертеди. Алим бла Марина Инстаграмда «Отар тукъум» деген бетде  тукъумну белгили адамларыны юслеринден  кёп зат басмалагъандыла.

Бу проект битеу башха тукъумлагъа да юлгюдю. Маринаны бла Алимни ниетлерин ангылагъан, аланы къатларында сюелген, Минги тауну тёппесине ала бла бирге чыгъаргъа сюйген башха тукъумладан да жашла табылгъандыла. Отарладан ючеуленнге – Алимге, Маринагъа, Салимге дагъыда Жаппуланы Юсуф, Ёзденланы Шамил, Шохайланы Темирлан, Геляхланы Ахмат, Жашууланы Азамат, Малкъондуланы Аскер эм суратчы Иван Головин къошулгъан эдиле. Кюн бузулуп, аны ачылырын да сакъларгъа тюшгенди. Биринчи кюнледе ашдан ууланнганла да болгъандыла. Алай не чырмауланы да ётерге кёлленнген жашла бла жигит къыз  артха турмагъандыла.

Марина тюбешиуюбюзню кезиуюнде хар тёлю ызындан келгенлеге билимин бергенин чертгенди. Жарсыугъа, таулу халкъ кёчюрюлгенде, Азияда кёп таматаларыбыз замансыз жашаудан кетгендиле, тёлюлени араларында байламлыкъ къарыусуз болгъан эди. Ана тилибизде не китап, не газет онюч жыл басмаланмай тургъаны да айныуубузгъа заран тюшюргенди. Болсада мюлксюз, жерсиз-юйсюз талада къалгъан тёлю Ата журтубузгъа къайтханды. Инстаграмда бетде Алим бла Марина тукъумлары ол жыллада сынагъанны юсюнден да жазгъандыла.

Жамауат а, жаш адамланы алгъышлап, алагъа «Купол» кафеде байрам къурагъанды. КъМР-ни Жазыучуларыны союзуну правленини башчысы Беппайланы Муталип, КъМР-ни Альпинизмни, таугъа чыгъыуну, спорт туризмни федерациясыны таматасы Ёлмезланы Абдул-Халим, Отарланы Исмайыл, Отарланы Мухтар, Курданланы Юсуф проектге къатышханланы, аланы ата-аналарын,  жетишимли къауумну алгъышлагъандыла. Жаш адамла уа «Адай» белги, «Отар 200» майдал бла Исмайыл бла  Керимни къызы Римманы саугъалагъандыла. Алимни аппасыны Мустафирни бир биригизни жюрютюгюз, тукъумну сыйын бийикде тутугъуз, бирлешигиз деген осуятын жаш тёлю эсинде тутханы баямды. Таматаланы сёзлери жерге тюшмеген дунияда ахшы умутлагъа жер барды.