Коллекторланы ишлерине контроль этиу къатыланады

Россейде  коллекторланы ишлерини юсюнден энчи закон  къабыл этилгинчи, гитче регион компанияла кеслерин асыры эркин жюрютгендиле. Борчларын заманында къайтаралмагъанланы  ызларындан тюшгендиле,  къысыулукъ этгендиле, къоркъутхандыла, тюйген кезиулери да болгъанды. Алагъа адамла къуруда тарыкъгъандыла, жазгъандыла.

Сюд приставланы  федерал службасыны  Къабарты-Малкъар Республикада Управлениясындан билдиргенлерине кёре,  2016 жылда федерал закон къабыл этилгенден сора коллектор агентстволаны ишлерине чек салыннганды. Ол закон кёп соруулагъа жууап бергенди.  Коллекторланы  къоркъутургъа эркинликлери бармыды? Угъай, жокъду. Ишге сёлеширге уа? Борчлу болгъан адамны жаланда ол  организацияда ишлегенин бла къалгъанын сорургъа эркинликлери барды.

Борчлу адамны телефонуна  сёлешип, СМС-ле жиберирге да эркин тюйюлдюдле. Аны бла  ишчи ыйыкъда  кече 22.00 сагъатдан башлап эрттенликде  8.00 сагъатха дери,  шабат, ыйых эмда  байрам кюнледе уа  ингирликде 20.00 сагъатдан эрттенликде 9.00 сагъатха дери   тюбеширге  эркин тюйюлдюле. Кредитор неда коллектор жаланда  кеслерини атларына жазылгъан телефондан сёлеширге боллукъдула.
Борч алгъан адам  ишин  законнга тийишлиликде бардырмагъан коллекторла бла кесин къалай жюрютюрге керекди? Сейирлерин къоруулай, тюрлю-тюрлю надзор ведомстволагъа тарыгъыу къагъыт жазып, болушлукъ табарыкъды.

Сюд приставланы  федерал службасы борчлу болгъанланы сейирлерин къорууларгъа хазырды. Коллектор агентствола  бузукълукъ этгенлери ючюн административ  жууапха тартыллыкълары закон бла   тохташдырылгъанды.

Борчларын заманында къайтаралмагъан гражданла, аланы тынчлыкъларын алгъанла чыкъсала, Сюд приставланы  федерал службасыны  Къабарты-Малкъар Республикада Управлениясына бу адрес бла келип билдирирге боллукъдула:  Нальчик шахар, Инесса Арманд атлы орам, 43 "А"  номерли юй.