Насыплылыкъ

Кесинги толусунлай насыплыгъа санар ючюн, бу жашауда не зат керекди.  Кертисин айтханда, алай кёп  угъай.  Ол къууанчлы сезимни болдурургъа да  къыйын тюйюлдю. Тюрлю-тюрлю къыралланы тинтиучюлери оюм этгенден, анга быллай  шартла себеплик этедиле.

Бизни къууандыргъан затла

Ахча

Тюзюн айтсагъ а, аны санагъан къууандырады. Кесингикиленими огъесе башханыкъыланымы  – уллу башхалыгъы жокъду.  США-дан алимле ол шартны бир ненча адамда сынагъандыла, бирлерине ахчаны шыкъырдатхандыла, башхаларына уа - бош къагъытны.  Биринчи къауумну кёлю иги да  кётюрюлгени, экинчиленики халлары уа ахыры бла да тюрленмегени ачыкъланнганды.

Жангы жерлеге барыу

Насыпны эмда жашауну татыуун толусунлай сезер ючюн жангы  жерлеге айгъа бир-эки кере чыгъыгъыз. Кёзюгюз юйреннген тёгерек-башны бир ауукъ заманнга окъуна алышындырсагъыз кёлюгюз жарырыкъды.

Къучакълашыу бла уппа этиу

Алимле оюм этгенден, адам толусунлай насыплы болур ючюн анга кюннге сегиз минутну  уппа этиу эм жети минутну къучакълашыу жетмейди. Къучакълашхан эмда уппа этген заманда, адамда насыпны гормонлары (эндорфин) чыгъып башлайдыла.

Шуёхла, нёгерле

Бек аздан он нёгери  болгъан адамны насып сезими  беш кереге кючлюрекди.  Шуёхлары беш неда андан азыракъ  болгъанладан жаланда къыркъ проценти кеслерин насыплыгъа санайдыла. Бешден оннга дери шуёхлулада  бу кёрюмдю элли  процентге дери кётюрюледи. Жашаугъа толусунлай ыразы болгъанланы эм бийик проценти уа ондан артыкъ тенги болгъанладады.

Эрттен ашха - къуймакъ

Жумуртхалада триптофан аминокислота барды, ол организмде кёл кётюрген серотонин кислотагъа айланады.  Толу насыпха эки жумуртха да тамамды. Алай къуймакъны ингирликден эсе  эрттенликде файдасы асламды. Не десек да,  танг аласында аш ашаргъа юйренмегенлени тынгысызлыкъ, депрессия сезимлери бирсиледен эсе бегирекди.

Бизни мудахландыргъан затла

Фаст фуд эм татлыла

Фаст фудланы аслам ашагъан адамлада депрессия къозгъалыргъа къоркъуу  элли бир процентге дери кёбюрек чыгъады.  Сизни харкюнлюк хант къангагъызда терк хазырланнган азыкъла аслам жерни ала эселе, къоркъуу бегирек чыгъады,  деп билдиредиле врачла.
Татлыланы юсюнден да тюз да алай айтыргъа боллукъду.  Аланы кёп ашагъанла кеслерин тортланы бла конфетлени сюймегенледен эсе насыпсызыракълагъа санайдыла.

Алтын  ышылса...  

Канаданы алимлери чертгенлерине кёре, алтын адамны терисине ышылып турса, ол нервалагъа тап келмейди:  сылтаусуз тынгысызлыкъ бийлейди, жюрек мдахланады. Специалистле алтынны ахырысы бла да жюрютмегиз демейдиле, жаланда аны кече  тешерге буюрадыла.

Соцсетьле

Интернет – нёгерлеригизни  соцсетьледе бетлерин ачып, алагъа къарап турсагъыз, кесигизни энчи жашауугъуз  башхаланыкъындан эсе татыусузуракъ кёрюннгенча болады.  Ахырында ол депрессиягъа,  бу жёнгерлеригизни кёрюп болмаулукъгъа келтиреди.

Тютюнле

Хар ичилген тютюн адамны  халин бузады,  тынгысызлыкъ бла ачыуланыу туудура.  Къыркъ жыллары толгъан британлыланы 6,5 мингин тинтгенден сора алимле тынгысызлыкъ бла депрессия тютюн ичгенлени онтогъуз процентинде болгъанын кёргюзтгенди. Тютюнню билмегенлени араларында бу тапсыз сезим жаланда он процентинде тюбейди.

Олтуруп турууну зараны

Ишде кёп заманны олтургъанлай тургъанла тири тебип айланнганладан эсе стресслеге бегирек  хорлатыргъа боладыла. Тинтиулени эсеплерине кёре, олтуруп турууну излеген иш тиширыуланы психоэмоциялы халлерин бютюн апчытханын белгилегендиле Австралиядан алимле.

Статистика

Россейлилени сексен проценти кеслерин насыплылагъа санайдыла. Бу эсеплени ВЦИОМ билдиреди.

Отуз жети  процент  кеслерини насыплылыкъларын юйюрлерини тап жашау турмушлары бла байламлы этеди.

Онсегиз процентинде уа ол сабийлери, туудукълары бла байламлыды.

Онеки проценти  жууукъ-ахлулары сау-саламат болсала кеслерин насыплылагъа санайды.

Онбир процент ишлеринде эм окъууларында табадыла жюрек балхам.

Алты процент сюймекликде насыплыды.

Дагъыда алты процент жашауларында хар зат тап болгъаннга санайды.

Тёрт процент юйюрлеринде жетишимлик бла ёхтемленеди.

Юч процент алагъа  шуёхлары билеклик этгенлерине къууанады.

Энтта юч процент а юйлю-фатарлы болгъанлары бла насыплыдыла.