Йога-кюннге къатышыргъа чакъырадыла

«Иш кёллю Россей» жамауат организацияны Къабарты-Малкъарда бёлюмюню башчысыны экинчиси Елена Давыдова алгъаракъда «Лотос» саулукъландырыу араны таматасы Габоланы Елена бла тюбешгенди. Ала сагъынылгъан организацияны келечилери эмда ким сюйсе да къатышыргъа боллукъ йога-кюнню бардырыуну юсюнден сёлешгендиле.

Бу башламчылыкъ «Иш кёллю Россейни» жер-жерли бёлюмюнден чыкъгъанды, йогадан инструктор Габоланы Елена уа аны бардырыргъа ыразылыгъын билдиргенди.

Организацияны сайтында айтылгъаннга кёре, Елена спорт гимнастика, карате, теннис бла сабийлигинден бери кюрешеди. Къыз КъМКъУ-ну спорт факультетин тауусханды. Ызы бла сегиз жылны анда «Физкультураны теоретика эмда методика мурдорлары» кафедрада ишлегенди. Ара шахарда «классика» эмда «степ-аэробика», «Pilates» эм башха программала бла окъугъанды. Артда йогагъа сейири къозгъалып, Индияда аны Ваджра тюрлюсюне окъугъанды. Бир талай замандан а инструктор болуп, «Лотос» ара ачханды. Анда ол Ваджра йогагъа эмда пилатесге юйретеди. Аланы экисинден да бай сынамы барды.

Алай бла йога-кюн 20 сентябрьде Нальчикде бардырыллыкъды. Анга, айтылгъаныча, предпринимательлени, бу затха сейирлери болгъан, саулукъларын кючлендирирге итиннген кимлени да чакъырадыла. «Ары келгенле бир бирлери бла танышыргъа, арада ишчи байламлыкъла къураргъа амал табарыкъдыла», деп белгилегендиле «Иш кёллю Россейни» регионда бёлюмюнде.