Маданият юйню заманындан алгъа ишлерикдиле

Нартанда Маданият юйню къурулушу тохтаусуз барады, деп билдиргендиле республиканы Къурулуш, жашау журт–коммунал мюлк министерствосундан. Ведомствода айтханларыча,  бу иш «Къабарты-Малкъар Республиканы культурасы» деген къырал программаны эмда «Культура болум» федерал проектни чеклеринде бардырылады.

Проектге кёре анда 400 къараучугъа жерле къураллыкъдыла. Юй кеси да эки къатлы боллукъду. Анда,  уллу залдан сора да, тюрлю-тюрлю кружоклагъа, студиялагъа, лекцияла бардыргъанлагъа отоула хазырларыкъдыла.

Объектде ишле графикге кёре барадыла. Къурулушчула мекямны къабыргъаларын къалап, башын да жабып бошагъандыла. Шёндю сюртюу-бояу, сантехниканы орнатыу, инженер коммуникацияланы тартыу бла кюреше турадыла. Проект бла Маданият юйню къурулушу быйыл декабрьни ахырына бошалыргъа керек эди. Алай подрядчикни тирилигини хайыры бла ол келир айда окъуна битерге ушайды.