Ток сетьлеге аслам абонент къошулгъанды

Быйылны биринчи жарымында «Россети Шимал Кавказ» компания ток ызлагъа 8773 жангы абонентни къошханды. Былтырны бу кезиую бла тенглешдиргенде, аланы саны онтёрт процентге кёбейгенди, деп билдиргендиле компанияны пресс-службасындан.

Жангы хайырланыучулагъа битеу да 182 МВт электрокюч жибериледи. Сурамны асламысы Дагъыстандады. Сетьлеге анда 3259 объект къошулгъанды. Ызы бла Чечен Республика барады, анда 2543 абонентге 28 МВт жиберилгенди. Дагъыда Ставрополь крайда – 968, Шимал Осетияда – 774, Къабарты-Малкъарда – 552, Къарачай-Черкесде – 411 эм Ингушетияда – 266 жангы хайырланыучуланы ток бла жалчытыу башланнганды.

Быллай абонентле бла бирге компания социальный жаны бла магъаналы объектледен да асламысын (111) къошханды сетьлеге. Ол санда школла, сабий садикле, медицина учрежденияла да бардыла. Иш бары да эпидемиология болумну осаллыгъына къарамай заманында этилгенди.

«Жангы хайырланыучуланы ток бла жалчытып башларгъа бар онгларыбыз бардыла. Сейирлери болгъанлагъа деп интерактивный сервисле жарашдыргъанбыз, абонентлени аллында борчларыбызны толтуруугъа контроль да кючленнгенди», - дегенди «Россети Шимал Кавказны» башчысы Виталий Иванов.

Эсге сала айтсакъ, бу айны биринчисинден башлап «Россети» холдинг электрокюч сетьлеге къошулууну адамлагъа, предприятиялагъа эмда организациялагъа иги да женгил этгенди. Энди заявканы ПОРТАЛ-ТР.РФ сайтха кирип электрон халда берирге, келишимни да анда этерге боллукъду.