Жерлеге контрольну азайтыргъа жарарыкъ тюйюлдю

Быйылны биринчи жарымында Россельхознадзорну Къабарты-Малкъар Республикада Управлениясыны жерлеге надзор этиу бёлюмю 96 контроль-надзор иш тындыргъанды. Аладан план бла – 16-сы, андан тышында – бири эмда 76 рейд бардырылгъанды, деп билдиргендиле ведомствону пресс-службасындан.

Бу ишлени кезиуюнде инспекторла битеу да 6116 гектар жерге къарап чыкъгъандыла. Тийишли законодательствогъа бузукълукъ этилген ишеклик бла КъМР-ни прокуратурасы бла бирге пландан тышында бир тинтиу бардырылгъанды. Аны кезиуюнде РФ-ни КоАП-ыны 8.6 статьясыны 1-чи кесегине тийишлиликде предпринимательге бир протокол жазылгъанды. Ол 30 минг сом тазир тёлерге эмда табылгъан бузукълукъну да кетерирге керек боллукъду.

Саулай айтханда, отчёт кезиуде он протокол жазылгъанды, жыйырма эсгертиу этилгенди эмда 45 минг сом багъасына тазирле салыннгандыла.
Бёлюмню специалистлери химия-токсикология тинтиулеге быйыл топуракъдан 29 проба алгъан эдиле. Агрохимия тинтиулеге уа лабораториягъа 77 проба жибергендиле.

Хайырланыучуланы сорууларына, тарыгъыуларына, оюмларына да тийишли эс бурулады. Бу кезиуде бёлюмге 165 письмо келген эди. Барына да закон бла белгиленнген заманны ичинде толу жууапла берилгендиле, деп ышандыргъандыла ведомствода.