Адамла, бизнесменле да аслам кредит алгъандыла

Былтыр Къабарты-Малкъарда розница халда берилген кредитлени ёлчеми 26,8 процентге кёбейип, быйыл биринчи январьгъа 92,5 миллиард сомгъа жетгенди. Ол санда хайырланыучула алгъан ахча,  21,3 процент къошуп, 50 миллиард сом болгъанды, ипотеканы ёлчеми уа,  33,8 процентге кёбейип, 43 миллиардха жетгенди, деп билдиргендиле Миллет банкны республикада бёлюмюнден.

Финанс учрежденияда айтханларыча, былтыр банкла абери сатып алырча – 1,6, ипотекагъа уа – 1,7 кереге аслам кредит бергендиле; бары да бирге 72 миллиард сом болгъанды. «2023 жылда была экилери да бек терк ёсгендиле. Аны экинчи жарымында, ключевой ставканы ызындан банк ставкала да кётюрюлгенлери бла, розница кредитле бла байламлы борчла азыракъ ёсюп башлагъандыла. Депозитледен тюшген файда уа ёсгенди», - дегенди Миллет банкны республикада бёлюмюню башчысы Аслан Калов.

Депозит дегенде, былтыр адамла банклада счётларына 55,7 миллиард сом салгъандыла.  Бу кёрюмдю, буруннгу жыл бла тенглешдиргенде, 20,6 процент къошханды.

Бизнес бла кюрешгенлени кредит портфельлери уа 36 миллиард сом болады. Озгъан жылда ол онеки процентге кёбейгенди. Ол санда 14,6 миллиарды уллу предприятияланы борчуду, къалгъаны уа орта эмда гитче предпринимательство бла кюрешгенлениди. Ахчаны ючден бири жарашдырыучу производстволагъа жиберилгенди, 26,5 проценти – эл мюлкге, 23,4 проценти уа – сатыу-алыугъа баргъанды.

Аслан Калов билдиргеннге кёре, былтыр тёртюнчю кварталда бизнесни кредит портфели терк ёсгенди. Анга къырал болушлукъ берген программала да себеплик этгендиле. Хайырланыучуланы бир кесегине уа кредит бериу излемле женгилирек болгъандыла.