«Халал къыйыны бла жашагъан миллет бла ёхтемленеме»

 Тырныауузда 8 мартда эсгериу митинг къуралгъанды. Анга кёпле къатышхандыла. Ары жыйылгъанланы араларында Ботталаны Ибрагим да -жамауат  келечи, огъурлу адам - болгъанды. Аны бла ушакъ этип, оюмун жазып алгъанбыз.

  - 8  март  манга бек къыйын кюн болгъанды.  Чексиз артыкълыкъгъа тёзгенди   халкъыбыз. Бир миллетни эсинде болмай тургъанлай, милициясы болсун, аскерчиси болсун, эшиклени  уруп,  адамланы элгендирип, олтуругъуз машиналагъа деп,  алай зор бла чыгъаргъандыла юйлеринден. Анабыз айтыучу эди: «Келтирип тюшюрген эдиле  бир станцияда. Андан а  колхозлагъа юлеше эдиле. Бизни бир элни сарайына элтип къуядыла. Ол элни адамлары узакъдан келип, туурадан  шош къарап сюеледиле. Сора, биз кеси арабызда сёлешгенибизни эшитип, тилибиз келишгенни ангылап башлайдыла. Андан сора батырыракъ болуп, келдиле. Ансы, бизни адам ашаучула сунуп тургъан эдиле».

Жолда–къолда да ненча адамыбыз дууасыз, кебинсиз къалдыла. Алай болса да, миллетибиз кючлюдю, намыслы, сыйлы, бир бирни сюйгенлебиз.  Ол шартларыбыз кёчгюнчюлюкде бютюнда кючленип, бир бирге эс буруп, бары да бирча къарыусуз болгъанлыкъгъа, гыржын туурамны бёлюрге кюрешип, жан кечиндиргендиле. Адамлыкъларын, миллет сезимлерин,  намысларын, сыйларын тас этмей, тиллерин сакълап,  кёп башха миллетлеге юлгюлю болуп къайталгъандыла. 

Ёсе келген жаш къауумгъа Аллах онг берсин! Туудукъларым келип менден къуруда соруучудула  ол заманладан эсимде къалгъан затланы. Мен да бек сюйюп хапар айтама алагъа. Бир да болмаса, эслеринде тутсунла.

 Эрттенликде  Нальчикде  митингге баргъанбыз  район къуллукъчула бла бирге. Мындан алгъа бир он жылны алып къарасакъ, адамла ол майданнга сыйыннган окъуна этмей эдиле. Быйыл а, адам да аз, бир буруула да салгъандыла, адамланы ичине жибермей, сёлешген да аз болду. 

Кёчгюнчюлюк сынагъан миллетлени араларында таулула бегирек къыйналгъандыла. Саныбыз аз да болуп,  ачыуу  а уллу эди.   Ата журт урушха  миллетни 29 процентин алгъандыла, ючден бирин. Бирси ючден экисин да элте барып  къум тюзлеге къуйгъандыла. Энди ол къалгъан ючден биринден жайыла барабыз. Алайды да, Аллах быллай къыйынлыкъны бир  кишиге да сынатмасын. Тюзлюгю бла, кесини халал къыйыны бла жашагъан  малкъар халкъбыз да  энди жаланда къууанч кюнлеге жыйылсын.