Тутулгъанны жамауатха къайтарыу жумушла ол эркин болгъунчу башланадыла

 12   мартда Россейни уголовно-толтуруу системасыны къуллукъчулары профессионал байрамларын белгилейдиле. Быйыл ФСИН къуралгъанлы 145 жыл толады, КъМР-де   аны бёлюмю ишлегенли уа 104 жыл болады. Жууапха тартылгъанланы терсликлерине жолукъдуруу федерал службаны КъМР-де Управлениясыны башчысы Александр Демидов байрам бла байламлы ведомствону тарыхыны, бюгюнлюкде борчларыны, келир заманнга муратларыны юслеринден айтханды:

- Озгъан жылланы ичинде уголовно-толтуруу система бир ненча кере алышыннганды.   Аны тарыхы 1879 жылда ич ишле министерствону къауумунда  тюрмеле жаны бла баш управление къуралгъандан бери башланады.

КъМР-де  жууапха тартыу биринчи  учреждение  1920 жылда къуралгъанды. Бюгюнлюкде республикада  ала тёртдюле,  алада сюдню оноуу бла эркинликлери  биринчи кере сыйырылгъан эр кишиле, алгъын да уголовный жууапха тартылгъанла, аманлыкъланы къайтарып этген тиширыула, бузукълукъну сунмай этгенле эмда артыкъ ауур болмагъан аманлыкъланы биринчи кере болдургъанла тутуладыла.

 Законну бузгъанны артха, жамауат жашаугъа къайтарыуну баш амалы – урунууду. Аны себепли  учреждениялада тутулгъанла эл мюлк бла кюрешедиле, малла тутадыла,  мебель этедиле, темирден тюрлю-тюрлю керекле жарашдырадыла, кийимле тигедиле. Битеу бу ишлери ючюн алагъа хакъ тёленеди. Аны бла бирге тутулгъанла окъургъа, усталыкъ алыргъа да боллукъдула. Орта профессионал  билим берген училищеде ишчи усталыкълагъа юйретедиле, окъууну бошагъаннга диплом бериледи.

Жууапха тартыу федерал службада тутулгъанланы жашау болумларын женгиллетиу жаны бла мадарла бардырыладыла.  Аны бла байламлы тюзетиу арала къураладыла. Алада уа сюдню оноуу бла жууапха тартылгъанла борчлу халда ишлеге тартыладыла, аны бла бирге ала жамауатдан айырылмайдыла. КъМР-де бюгюнлюкде аллай тёрт ара ишлейди.

Быйыл 1 январьда  «О пробации в РФ» федерал закон кючюне киргенди. Анга кёре, тутулгъанны жамауат жашаугъа къайтарыу жумушла  ол   эркин болгъунчу   башланадыла. Сюд тохташдыргъан болжал бошалгъынчы 9 ай алгъа тутмакъ анга жашагъан жеринде иш табаргъа, билим алыргъа, праволу соруула жаны бла консультация бардырыргъа тилек жазаргъа боллукъду.  Дагъыда анга психология болушлукъ да этиледи, башха себепликле белгиленедиле. Алай закон керти да хайырлы болур ючюн,  ФСИН   бла бирге  аны тамамлаугъа власть органла да къошулургъа тийишлидиле. Тутмакъдан чыкъгъанны жамауат жашаугъа къайтарыу жаны бла муниципал эм къырал программала керекдиле. Жаланда алай бла къайтырыкъды инсан низамлы жашаугъа.

Бизни къуллукъчула аманлыкъла этгенлерине ишеклилени бла терсленнгенлени сакълайдыла, жууапха условно тартылгъанла кеслерин къалай жюрютгенлерин тинтедиле,   учреждениялада аманлыкъланы тохтатыу эм аланы болдурмау жумушланы толтурадыла, алача башха жууаплы ишлени тамамлайдыла. Бу усталыкъны энчиликлерине ведомстволу вузлада юйренирге онг барды. Сёзге, быйыл республиканы школларын тауусханла ФСИН-ни бийик билим берген беш учреждениясына окъуугъа кирирге боллукъдула.   Ведомствогъа ишге квалификация излемлеге келишген башха инсанла кирирге боллукъларын айтыргъа сюеме, ала ФСИН-ни вузларын тауусмагъан эселе да.

Уголовно-толтуруу система   тахыр жолунда кёп сынаулагъа тюбегенди дерге  боллукъду. Мындан ары тамамларгъа керекли жумушла кёп болгъанларын ангылайбыз. Аны себепли Управленияны коллективи салыннган борчланы бет жарыкълы толтурургъа, право низамны бла къоркъуусузлукъну сакъларгъа хазыр болгъанын шарт айтама.

 Бу байрам кюнде уа ведомствону ветеранларын, ишчи нёгерлерими алгъышлайма. Биз тамамлагъан жумушла не заманда да къыйын болгъандыла. Алай иш кёллюлюк, профессионал сынау мындан ары да жетишимле болдурургъа себеплик этерикди. Бу байрам кюнде уа сизге, жууукъларыгъызгъа саулукъ, ырахматлыкъ, узакъ ёмюр тежейме.