Бизнесге учуз кредитле

Россейни Экономиканы айнытыу министерствосу «1764» деген учуз кредит программасыны быйыл ал он айгъа эсеплерин чыгъаргъанды. Аны хайырындан Къабарты-Малкъарда гитче эмда орта предприятияла (МСП) 750 миллион сом къоллу болгъандыла. Бу программаны бардырыугъа Россейни Банкы, МСП Корпорация да къатышхандыла, деп билдиргендиле КъМР-ни Экономиканы айнытыу министерствосундан.

«Ключевой ставка кётюрюлгенине да къарамай, бу программада гитче эмда орта бизнесге льготалы излемле сакъланып турадыла. Ол а ма бу бёлюмледе къармашханлагъа тийишлиди: жарашдырыучу производстволада, логистикада, къонакъ юйлени ишин бардырыуда, профессионал, илму эмда техникалы жумушлада», - деп белгилегенди РФ-ни экономиканы айнытыу министри Максим Решетников.

Келир жылдан башлап, банкла МСП-ны алчы инвестициялы проектлерине жыл сайын 100 миллиард сом чакълы бир кредитле бла себеплик этип тураллыкъдыла. Сагъынылгъан бёлюмледе ишлеген предприятияла 50 миллиондан башлап, 2 миллиардха дери сом алыргъа боллукъдула. Кредит он жылгъа дери бериледи. Биринчи беш жыл льготалы кезиуге саналады. Юч жылны ичинде аны ставкасы (орта бизнесге) 7,5 процент боллукъду, къалгъанлагъа уа – 9 процент.