Жангылыкъла

Билимни кюнюнде Нальчикни окъуучулары «Водительле! Сакъ болугъуз! Сабийле мектепге барадыла!» деген чакъырыуу бла флешмоб бардыргъандыла. Бу ишге Нальчикни ГИБДД-сыны таматасы полицияны майору Вячеслаев Агеев да къошулгъанды.

Республиканы Къыраллыгъыны кюнюне жораланып, Нальчикни солуу паркында художниклени бла сурат алыучуланы чыгъармаларыны "Кесини ызы" деген тёрели кёрмючлери ачылгъанды. Аны КъМР-ни  Культура министерствосу, республиканы Миллет музейи, Къабарты-Малкъарда суратлау искусстволаны А.Л. Ткаченко атлы музейи да къурагъандыла.

Къабарты-Малкъар Республиканы Къыраллыгъыны кюнюнде аны азатлыгъы ючюн жанларын-къанларын аямай сермешгенлеге баш уруу, Нальчикде солуу паркда Ёмюрлюк отха гюлле салыу ахшы тёреге айланнганды.

Республиканы Къыраллыгъыны, Нальчикни эмда Билимни кюнлерине жораланнган концертле шахарны кёп жерлеринде ётгендиле. "Восток" кинотеатрны аллында, хар замандача, "Родник" хор жырлагъанды. Жабагъы Къазаноко атлы эстетика арагъа жюрюген къызчыкъла бла жашчыкъла уа усталыкъларын Атажукъ улуну терек бахчасында кёргюзтгендиле. "Биз - Кавказны балаларыбыз! Анга кертичилебиз!" деген ат бла къуралгъан концерт программагъа къатышханла уа уста тепсегенлери эм жырлагъанлары бла къараучуланы ыразы этгендиле.

Быйыл Нальчикни 14-чю номерли гимназиясында 1920 жаш бла къыз окъурукъду.

Хасанияны Фрийланы Рамазанны атын жюрютген 16-чы номерли школу 1 сентябрьде отуз сабийге эшигин биринчи кере ачханды.

«Россей Федерацияда къырал контрольну (надзорну) эм муниципал контрольну юсюнден» 248-чи федерал законнга кийирилген жангы излемлеге кёре, от тюшюуге къоркъуусузлукъну жалчытыу жаны бла къырал инспекторла тохташдырылгъан планнга тийишлиликде учреждениялада профилактика тинтиуле бардырыргъа борчлудула.

Бу кюнледе Къабарты-Малкъарны  кёгетле бла наныкъла ёсдюрген мюлклеринде 100 тонна чакълы алма, эрик, кертме, алыча, шаптал жыйылгъанды.

Къабарты-Малкъарны Жамауат палатасында республиканы бла Санкт-Петербургну Жамауат палаталарыны араларында байламлыкъла жюрютюуню юсюнден келишим тауусулгъанды.

Терек бахчачыла къурагъан «Иги тирлик» деген биригиуюню келечилери бла Россельхозараны республикада бёлюмюнде тюбешиу болгъанды. Анда жемишлени жыйыуну юсюнден хапарлагъандыла.