Байламлыкъланы баш мураты – ахшы башламчылыкъланы толтуруугъа себеплик

Къабарты-Малкъарны Жамауат палатасында республиканы бла Санкт-Петербургну Жамауат палаталарыны араларында байламлыкъла жюрютюуню юсюнден келишим тауусулгъанды.

Санкт-Петербургну палатасындан келечиле - Константин Блохин бла Дмитрий Чагин – республикагъа ишчи жолоучулукъ бла келгендиле. Бек алгъа ала Минги тауда регионну къыраллыгъыны 100-жыллыгъына аталып бардырылгъан дуния рекордланы фестивалына къатышхандыла.  

Андан сора Нальчикде палатаны мекямында башда сагъынылгъан келишимге къол салгъандыла. Константин Блохин чертгенича, аны баш мураты – эки органны араларында шуёхлукъ байламлыкъланы тохташдырыу, бирге ишлерча майдан къурауду. «Кеслерини сынамларына юйретирик, болушургъа хазыр, профессионал эм башха байламлыкъла жюрютюрюк партнёрла табыу бек магъаналы жумушду. Бирге ишлеуню эсеби уа ахшы программаланы бла проектлени жарашдырыу боллукъду», - дегенди ол.

Эксперт Дмитрий Чагин а Жамауат палата, бек алгъа, адамланы бла властьны араларында ушакъ бардырыргъа онг берген жер болгъанын белгилегенди: «Ол граждан башламчылыкъла жаратылгъан органды. Регионла араларында келишимле уа не тюрлю борчланы да тамамлауда жангы онгла ачадыла, ол себепден бюгюннгю ишни магъанасы бек уллуду».

Республиканы Жамауат палатасыны аппаратыны башчысы Анна Дьяченко, кесини оюмун билдире, бу проект жетишимли болуруна ышаннганын айтханды.

Кульчаланы Зульфия.
Поделиться: