Кёгетледен бла наныкъладан бай тирлик жыйылырын сакълайдыла

Бу кюнледе Къабарты-Малкъарны  кёгетле бла наныкъла ёсдюрген мюлклеринде 100 тонна чакълы алма, эрик, кертме, алыча, шаптал жыйылгъанды.

Бусагъатда  алманы кёп заманны сакъларгъа жарамагъан тюрлюсюн юзедиле.  Ол себепден тирликни асламысы  ауур жюк ташыгъан машиналагъа жюкленип къыралны регионларына ашырылады.

Бир къауум  кюнден терек бахчалыкълада  жаз башына дери  асыраргъа жарагъан сортланы да жыйып тебирерикдиле. Аны да сатылгъаны сатылып, къалгъаны  уа бир  къауум айгъа холодильниклеге салынырыкъды.  

Аны бла бирге  эл мюлк предприятиялада,  фермер мюлкледе эм энчи иеликледе   наныкъланы тирлигин да  кетередиле. Бусагъатда аны  тюрлю-тюрлюлеринден 1,2 минг тонна алыннганды.    

Эсге сала айтсакъ, былтыр Къабарты-Малкъарда эл мюлкде уруннганла саулай 517,3 минг тонна чакълы кёгет бла наныкъ жыйгъандыла. Быйыл бахчалада болумгъа кёре, жерчиликде къармашханла  андан да бай тирлик алыныр муратлыдыла.