Стандартизацияны халкъла аралы кюню

Хар жыл сайын онтёртюнчю октябрьде битеу дунияда да Стандартизацияны халкъла аралы кюнюн белгилейдиле. Бу дата бирикген стандартланы магъаналылыкъларына адамла эс бурур, аны бла бирге быллай иш бла кюрешген специалистлени усталыкъларын белгилер ючюн къуралгъанды.

Байрамны къуралыу тарыхыны юсюнден айтханда, 1946 жылда 14 октябрьде Лондонда стандартизация жаны бла ишлеген миллет организацияланы конференциясы ачылгъанын сагъыныргъа тийишлиди. Анга къадар къыралдан, ол санда СССР-ден жетмишге жууукъ делегат къатышханды. Конференция къыйматлы болгъанды, аны ахырында уа стандартизация жаны бла халкъла аралы организация къураргъа оноу этилгенди. Биз аны ISO (ИСО) деген ат бла билебиз. Ол кеси да грек тилден «isos»-«тенглик» деген сёзню магъанасын тутады.

Стандартизацияны баш магъанасы - къайсы ишде да анга къатышханланы хар бирине да тап келген, къоркъуусузлукъну, аяулукъну излемлерин да эсге алып алай жарашдырылгъан жорукъланы жарашдырыуду. Сёз мында илмуда, техникада, промышленностьда, эл мюлкде, къурулушда, транспортда, маданиятда, саулукъ сакълауда, сатыу-алыуда эмда кёп башха сфералада энчи бир продукцияны, мардаланы, амалланы, сёзлени, белгилени юслеринден барыргъа боллукъду. Производствону къайсыны да айнытыу атламлары кёбюсюнде стандартизациягъа кёре боладыла. Илмуну, техниканы, жашауда сынамны эм жангы жетишимлерине таянып бу сфераланы алгъа тюртген кючледен бириди ол.

Къабарты-Малкъарда бу жумушланы «Стандартизацияны, метрологияны эм сынамланы къырал регион арасы» федерал бюджет учреждение жалчытады. Быйыл бу байрам «Эм иги дуниягъа къарам» деген чакъырыу бла белгиленеди.

Жыл сайын Россейде миллет стандартизацияны Программасы къабыл этиледи. Аны келир жылгъа проектин бу айны ючюнчюсюнде техника тийишдириу эмда метрология жаны бла Федерал агентствода стандартизация Советни кенгешинде сюзгендиле.

Стандартла къоркъуулу аурууланы жайылыууна къажау кюреш бардырыргъа да болушадыла. Битеу дунияда стандартизация жаны бла специалистле жамауатны саулугъун, къоркъуусузлугъун сакълар эмда инфраструктурагъа себеплик этер хыйсап бла бек уллу къармашыудадыла. Коронавирусдан вакцинаны къураугъа эмда лабораториялада аны сынам халда хайырланып кёрюуге Стандартизация жаны бла халкъла аралы организацияда эмда Халкъла аралы электротехника комиссияда бийик магъана бередиле. Сёз ючюн, жангыртылгъан ИСО 22367:2020 стандартны хайыры бла лабораториялада жангылычланы азайтыргъа къолдан келликди. Бу документде медицина тинтиуле бла байламлы рекомендацияла бардыла.