Эсеплеге кёре – айырмалыланы санында

Рязань шахарда бу кюнледе МФЦ-ланы битеуроссей форуму ётгенди. Аны чеклеринде, РФ-ни Экономиканы айнытыу министерствосу къурагъан «Россейде 2022 жылда Кёп жумушла тамамлагъан араланы айырмалылары» конкурсну эсеплерин чыгъаргъандыла. Ары уа жетмиш субъектден жюз бла жарым заявка берилген эди. Алай бла конкурсну «Айырмалы регион МФЦ сеть» эмда «Айырмалы МФЦ проект» номинацияларында Къабарты-Малкъар Республика лауреат болгъанды, деп билдиргендиле КъМР-ни Экономиканы айнытыу министерствосундан.

Ведомствода айтханларыча, бу жетишим республикада «Цифралы къырал оноу этиу» эмда «Къырал адамлагъа» проектле къыйматлы бардырылгъанлары бла байламлыды. Къырал жумушланы тамамлау, аланы бериуню игилендириу жаны бла бёлюмде аслам иш этиле барады.

Форумда дагъыда МФЦ-ланы быйыл экинчи кварталда рейтингин кёргюзтгендиле. Тарихлени РФ-ни экономиканы айнытыу министрини орунбасары Алексей Херсонцев туура этгенди.

Тинтиуле тёрт жаны бла бардырылгъан эдиле: хайырланыучуланы жумушларына къараучу бёлюмлени иши, къырал пошлиналаны тёлеу эмда МФЦ-гъа аллындан жазылып баргъан нечик женгил болгъаны, специалистлени айлыкъ хакъларыны ёлчеми.

 Ишлери эм къыйматлы болгъанланы санына 52 регион тюшгенди, аланы арасында Къабарты-Малкъар Республика да. Бюгюнлюкде КъМР-де бу учрежденияны онеки бёлюмю барды, тышына чыгъып 118 адамы ишлейди. Алада 333 тюрлю къырал эмда муниципал жумушланы тамамларгъа жарайды. Быйыл тогъуз айны ичинде МФЦ-гъа адамла 700 минг кере баргъандыла, алагъа 541 минг жумуш берилгенди.