Ток бла жалчытыу ышаннгылы болурча

«Россети Шимал Кавказ» компанияны Къабарты-Малкъарда бёлюмюню – «Каббалкэнергону» специалистлери «Нальчик-СКЭП» бийик вольтлу ток ызны жангыртхандыла. Ала анда тёрт темирбетон чыпынны эмда 1,5 километр эски чыбыкъланы алышхандыла.

Бу ыз республиканы ара шахарын электрокюч бла жалчытыуда бек магъаналыгъа саналады. Ол кеси да «Нальчик» эмда «СКЭП» подстанцияланы бирге къошады, дегендиле компанияда. Биринчиси 70 минг чакълы адамны, экинчи подстанция уа «Завокзальный» микрорайонну (15 минг адам) ток бла жалчытадыла.

«Компания былтыр «СКЭП» объектни иши ышаннгылы болурча мадар этгенди. Бизни специалистлерибиз анда 1991 жылдан бери хайырланылып тургъан трансформаторну жангысына алышхандыла. Анга эмда башха жумушлагъа 60 миллион сом къоратылгъанды», - деп белгилегенди «Каббалкэнергону» башчысы Муртаз Каров.