«Баш борчубуз адамланы ыразы этергеди»

(аллы 11 октябрьде басмаланнганды)

 - Сизде ишлегенлени юслеринден да айтсагъыз эди? 

-  Кадрланы юсюнден айтханда,  бюгюнлюкде учрежденияда 160 адам къармашады.  Ол санда медицина бёлюмде - 60, ашханада -50, инженер службада -20, къонакъла бла байламлы жумушланы тамамлагъан (горничныйле) -20 эм администрацияда 10 адам урунады. 

Иш жетишимли барырча кадрладан кёп зат къалады. Ишлерине уллу кёллю болгъанла бизде кёп мычымайдыла. Борчларын тынгылы толтургъанла уа ишлеринден  къууанырча мадар этерге кюрешебиз. Иш хакъларын башха жерледен кёбюрек тёлейбиз.  Ол санда ай сайын техника  персоналны  арасында эм игилени айырмай,  премия бермей къоймайбыз. Сёз ючюн, быйыл аллай даражагъа:  слесарь-сантехник Вячеслав Шогенов, медсестра Фатима Бекулова, официантла Татьяна Акаева бла Маммеланы Фатимат, партье  Валерия  Барагунова эм горничная Юлия Жетишева тийишли болгъандыла.

Кёп заманны ишлей келген, билимли эм сынамлы кадрланы юсюнден айтханда, баш бухгалтерни  Залина Халилованы, баш врачны Оксана Бербекованы, баш инженерни Аслан Гучевни, ашхананы таматасы Атмырзаланы Зареманы эм башхаланы белгилерге боллукъду. Кёплени сагъынмайма жанларына тиймез.

- Келир заманда къаллай муратларыгъыз бардыла? 
- Этилирге керек  ишле алыкъынчы бардыла. Болсада жууукъ заманда эски корпусну жангыртыргъа, процедураладан сора солуучула сууукъ болмазча  мекямланы арасында жабыкъ жолчукъ да ишлетирге  сюеме. Медицина кабинетлеге  ремонт этерге, жангы оборудование алыргъа да муратыбыз барды.  

- Жетишимлигигизни тасхасы недеди эмда асламысында не затха эс бурасыз? 
- Бюгюннгю излемледен артха къалмазча билимими ёсдюрюрге кюрешгенлей турама. Ишимде   Интернетни, социал сетьлени да хайырланама. Не заманда да иги болургъа, жангы муратла салыргъа, алагъа жетиширге итинирге къоркъмазгъа керек сунама. 
Къачан да адамны   профессонал жанына, адамлыгъына  эс бурмай къоймайма эм бек багъалайма.  

Бюгюнлюкде жетишимли ишлегенибизни  баш сылтауларындан бирин  иш кёллю адамларыбызда кёреме. Тутхан жумушубузну тийишли халда бардыргъаныбыз ючюн кёп  кере  саугъалагъа да тийишли болгъанбыз. Ол санда КъМР-ни Парламентини Сыйлы грамотасына, Курортла эмда туризм министерствону Ыразылыкъ къагъытына, «Азимут» биригиуню,  «Маршрут пастроен» миллет турист премияны  дипломларына эм башхалагъа тийишли болгъанбыз.

Биз мында солугъан  къонакъланы бир къауумундан  оюмларын да билирге излегенбиз.

Константин Ушаков: «Мен Москвадан келгенме, темир базада ишлейме. Санаторийни юсюнден нёгерлеримден эшитип билеме, ала бек махтагъандыла. Мында солугъанлы он кюн болады. Хар нени да бек жаратханма, ыразыма.  Минги тауну тийресинде да болургъа жетишгенме.  Онг табып экинчи кере да къайтмай къаллыкъ тюйюлме»;

Чернов Леонид: «Бусагъатда Москва  областьни Солнечного́рск шахарында жашайма. Пенсиягъа кетгинчи Россейни темир жолларында алтмыш жыл ишлегенме. Нальчикде биринчи кере солуйма. Манга 85 жыл болсада, топну къууаргъа бек сюйме. Алай арт заманда тобукъларым къыйнап къоймайдыла. Танышларымдан мында багъылыр онг болгъанын билип келгенме.  Мында солугъанлы алты кюн болады, къысха заманда окъуна  табыракъ болгъанымы сеземе. Учрежденияда болумгъа, адамланы да бет жарыкълы бола билгенлерине бек бюсюрегенме.  Тамаша табийгъатызны да адам унутурча тюйюлдю, жетишалсам,  Ингушетиягъа да барлыкъма. 

Яровая Светлана: «Саратовдан кесим машинам бла келгенме. Профессионалланы хазырлау эм билимлерин ёсдюрюу жаны бла Балаков атлы институтда «Социально-гуманитарных и естественно-прикладных дисциплин» кафедрагъа башчылыкъ этеме эм преподаватель болуп ишлейме. 

 Мен кёп санаториялада болгъанма, ол санда къоншу Ставрополь крайда да,  алай арт беш жылда жаланда бери жюрюйме.  Биринчи жылда окъуна мында ишлегенлени  къонакъбайлыкълары  жюрегими бийлегенди.  Ибрагимни да кёре турама, аныча ишинде хар затха эс бургъан таматаны танымайма. Уллу кёллю болмай, хар солуучуну жарсыуун тамамларгъа кюрешеди. Процедурала бек жарайдыла, врачладан башлап массажистлеге дери  билимли специалистледиле. Къалай тап боллугъун ангылатадыла, энчи кёзден къараргъа кюрешедиле.