Республиканы ариу жерлерине жолоучулукъ

«Кавказ GranTurizmo» турист проектни чегинде республиканы туризм жаны бла толтуруучу власть органларыны себепликлери бла Къабарты-Малкъарда къонакъда эм уллу федерал турист операторланы – «Пегас туристик», «Невские сезоны», «ТТ – тревел», «Магазин путешествий», «Транссервис», «Алеан» эм башхаланы – келечилери болгъандыла.

Курортла эм туризм министр Мурат Шогенцуков айтханыча, алчы турист операторла бла байламлыкъла жюрютюу жангыз да энчи бир субъектге угъай, саулай да Шимал-Кавказ регионнга хайырлыды. «Информация жолоучулукъла Кавказны солуу къурауда онгларын ачыкъларгъа, хар республиканы энчилигин кёргюзтюрге болушадыла. Бизге, эм алгъа, эки шарт магъаналыдыла: инфраструктура жаны бла байламлыкъ жюрютюу эм мындан арысында да бирге ишлеу», - дегенди ол. Проектни куратору Индустрияны эм къонакъбайлыкъны битеумиллет союзуну вице-президенти Наталья Осипова уа экспертлеге къаллай борчла салыннганларыны юсюнден билдиргенди. Экспертле айтханларыча, бек алгъа, жолоучулукъланы жарашдырыргъа эм аланы саулай да Шимал Кавказда экскурсия маршрутланы бирикдирген «Кавказ GranTurizmo» жыйышдыргъан турланы санларына кирирча этергеди. Наталья Осипова белгилегенича, Къабарты-Малкъарда экскурсия продуктну мурдоруна къышны Минги тауда, жайны уа Нальчикде кёргюзтюп, «12 месяцев» жомакъны салыргъа боллукъду.

Алай бла къонакъла Минги таугъа баргъандыла, Нальчикни ариу жерлерин кёргендиле, Огъары Малкъарны сейир къалаларына къарагъандыла, тарыхы бла шагъырейленнгендиле, миллет ашарыкъла бла сыйланнгандыла. Къабарты-Малкъардан сора уа Шимал Осетия-Аланиягъа атланнгандыла.