Жамауат ыспас этерча врач болур умутдады

Быйыл Къабарты-Малкъар къырал университетни колледжлерин бла институтларын къызыл дипломлагъа 576 жаш бла къыз бошагъанды. Окъуу юйню медицина факультетини «Багъыу иш» бёлюмюн жетишимли тауусханланы арасында уа Чочайланы Танзиля да барды.

Ол ариу тау элибизде – Къашхатауда – ёсгенди. Школну да мында алтын майдалгъа бошагъанды. Мектепде окъугъанында, дерслерин иги билгенинден сора да, аны жамауат ишине да тири къатышханды. Алай эсе да, къайсы бирибизни да гитчелигибизден да жюрегибиз бла жаратхан дерсибиз болмай къалмайды. Ол а биологияны бла химияны айырып сюйгенди. Аллай сюймеклигини себеплиги бла уа  район, республика даражалы олимпиадалада жетишимли бола тургъанды.

Дагъыда жюреги жаратхан зат – сурат ишлеу. Аны бу жанына хунерин кёпле эслегендиле эмда биледиле. Бош заманында да Танзиля эм алгъа сурат ишлейди. Ол аны арыгъанын кетереди, окъуууна жангы кюч бла берилирге эс тапдырады. Асламысында уа ол табийгъатны суратлайды.

Бир къырал экзаменлени бере туруп, асыры  бек жарсып, кесин керексиз къыйнагъанын да жашырмайды. «Орус тилден эсеплерими билгенимден сора уа, аланы жаратмай, жилягъан окъуна этген эдим», - деп кюледи. Алай  эсе да, химиядан  а 92 баллгъа тийишли болгъан эди.

Сынауланы барысындан да аз къалып юч жюз балл алады да, аны хайыры бла беш башха-башха университетге къагъытларын иеди. Аланы барысыны да бюджет бёлюмлерине тюшеди. Къууаннган этсе да, онжети жылында тыш шахаргъа кетип,  анда билим алыргъа базыналмай, Нальчикде къалады. Бюгюнлюкде уа Къабарты-Малкъар къырал университетде сайлауун тохтатханы ючюн къадарына ыразыды.

Химиядан а аллай бийик эсепге устазы Токумаланы Анна Юсуповнаны хайыры бла жетгенин черте, анга ыспас этеди.

Университетде да Чочайланы къызлары биринчи курсдан да окъуууна уллу кёллю болмай, эм алгъа къыйын кёрюннген эсе да, бу усталыкъны бошдан сайламагъанын кеси кесине да ачыкълай, жетишимли окъугъанланы, волонтёрлукъ бла кюрешгенлени санында  болгъанды. Аны билимге, окъуугъа кёз къарамын эслеп, «Лучевая диагностика» ыздан дерсле берген устаз Чочайланы Марина Жагъафаровна Танзилягъа илму бла кюрешсе тюз боллугъуну юсюнден да айтады. Аны айтханы бла уа хунерли къыз бу жаны бла да ангылауу айырмалы болгъанын кёргюзтеди.

Алай бла экинчи курсда окъугъанында, Ставропольну къырал медицина университетинде студентлеге деп бардырылгъан халкъла  аралы олимпиадагъа къатышханды. Анда биринчи жерге тийишли болуп къайтханды. Ары барыргъа уа аны «Нормальная физиология» кафедраны башчысы Анатолий Беталович Иванов, аны къалай окъугъанын кёрюп, алай сайлагъанды.

Саулай а Ставропольгъа Къабарты-Малкъардан беш студент баргъан эди. Танзиляны эришиуледе, олимпиадалада болдургъан жетишимлерини уа бу жаланда бир юлгюсюдю. Аны илму ишлери РИНЦ-ни эмда ВАК-ны тизмелерине кирген журналлада басмаланнганларын да чертирчады.

Белгилегенибизча, ол волонтёрлукъ бла да кюрешгенди. Поликлиникалада бла больницалада врачлагъа, бирси медицина ишчилеге болушлукъ этип тургъанды. Бу жумушха уллу кёллю болмагъаны уа сынам жыйышдырыргъа, аслам затны ангыларгъа, алагъа теренирек тюшюнюрге да себеплик этгенди.

Устазларыны юслеринден айта, ол Марина Жагъафаровнаны билимин, ангылауун, адамлыкъ ышанларын да белгилей, аны бла бирге Атталаны Мадина Жамаловнаны, «Госпитальлы терапия» ызны преподавателин, аны окъуулулугъу, жаш адамлагъа не жаны бла да болушлукъ этерге итиннген къылыгъы ючюн да ыспас этеди. Аллай адамларыбыз барлыгъы аны кёлюн кётюргенин, ала жашлагъа бла къызлагъа кеслери билгенни къызгъанмагъанларын, окъууда, жашауда да сайлауларына кёре неге эс бурсала тюз боллугъун ангылатыргъа да  угъай демегенлерин айтады.

Аны бла бирге уа кесибизни университетде да окъуйма, билим алама деген жаш адамлагъа хар не тюрлю амалла да барлыкъларын чертеди. Аны себепли уа аланы окъутханланы  бла юйретгенлени барысына да ыспас этеди.

Барыбыз да ангылайбыз медицина факультетде билим алгъан тынч болмагъанын. Алай эсе да, сайлауларына кертичилей къалып, жетишимли болгъанларыбыз барлыкъларына биз да кёлленебиз.

Аланы санларына къошулургъа излей, Танзиля бюгюнлюкде ординатурагъа Москвада офтальмология, башхача айтханда уа, кёзню микрохирургия жаны бла киргенди. Анда билимин ёсдюре, сынамы бла бирсиле да хайырланалырча, этген ишине жамауат ыразы болурча, ыспас да этерча врач болур  умутдады.

Окъууунда эндиге дери болдура келген жетишимлери ючюн а ыннасы Фатиматха, анасы Хохоналаны Зухурагъа бла атасы Илиясха ыразыды. Атасыны жанындан юйюрлери уллу, адамлары кёп болгъанына къууана, аны ючюн кесин насыплыгъа да санайды. Эгеч-къарындаш арасында хурметни, сюймекликни да сезе, юйюрде кесини ызындан ёсюп келгенлеге да ахшы юлгю кёргюзтюуню тюз кёреди.