Жолланы жангыртыу

Бизни республикада ахыр кезиуледе жолланы жангыртыу жаны бла аслам ишле этиле баргъанын барыбыз да кёребиз. Къайсында не зат этиллигин билирча эм биринчиден алада къаллай объектле тургъанларына къарайдыла: школла, сабий садикле, медицина учрежденияла.

КъМР-ни Транспорт эмда жол мюлк министерствосундан билдиргенлерине кёре, «Къоркъуусузлу тынгылы жолла» миллет проектни чеклеринде алты элде битеу да 25 километр жангы жолла эмда аланы участкалары ишленнгендиле: Огъары Басханда, Экинчи Лескенде, Ероккода, Каменномостскоеде, Хабазда. Сора Заюково элде бир кёпюр.

Алай бла Огъары Басханда Джаппу улу атлы орам жангыртылгъанды – анда элни фельдшер-акушер пункту турады. Объектде асфальт жарашдырылгъанды, кёпюрге ремонт этилгенди, къоркъуусузлукъну жалчытыу аны бла да аслам иш тамамланнганды.

Экинчи Лескенде, Ероккода, Каменномостскоеде эмда Хабазда саулукъ сакълау учрежденияла орналгъан орамла жангыртылгъандыла.

Заюковода кёпюр а толусунлай жангыдан ишленнгенди. Аны узунлугъу отуз метрге жетеди. Элчиле аны бла район арагъа, больницагъа да барадыла.

Сагъынылгъан проектни хайырындан Нальчик шахар округда да къадар иш этиле барады. Сёз ючюн, Шогенов атлы орам тынгылы жангыртылады. Анда уа: Перинатал ара, Сабийни юйю, Республикалы сабий клиника кёп профильли ара, кардиология диспансер турадыла. Шёндю анда асфальт жая турадыла, тротуарланы жарашдырадыла эмда бордюрла орнатадыла. Дагъыда парковкала ишлерикдиле, кече чыракъла бла жарыкъ болурча этерикдиле. Белгиле, светофорла, буруула орнатып, къоркъуусузлукъгъа да тийишли эс буруллукъду.