Билим бериуде инновацияла бла шагъырейлениу

    Бу кюнледе Къабарты-Малкъар къырал аграр университетде «Россейни педагоглары: билим бериуде инновацияла» деген битеуроссей форум бардырылгъанды. Аны ишине КъМР-ни жарыкъландырыу, илму эм жаш тёлюню ишлери жаны бла министр Ауэс Кумыков, вузну ректору Аслан Апажев, «Единая Россия» политика партияны республикада бёлюмюню башчысы Дмитрий Парфилов, орта школланы, сабий садиклени таматалары эм келечилери къатышхандыла, деп билдиргендиле КъМКъАУ-ну пресс-службасындан.
      Бу форум бизни республикада биринчи кере бардырылады. Ол кеси да 2010 жылда Екатеринбургда Битеуроссей педагогика жыйылыуну болушлугъу бла къуралгъанды. Аны баш магъанасы - орта эмда школгъа дери билим бериу системалагъа инновациялы технологияланы сингдириу жаны бла къырал стратегияны тамамлауду. Аны хайыры бла Россейни билим бериу жамауатын бир системагъа бирикдирирге амал табылгъанды. Форумну проектлери быйылны аллындан башлап Битеуроссей педагогика жыйылыуну къырал даражалы магъананы тутадыла. Хар жыл сайын къыралны уллу шахарларында жыйырма конференция-кёрмючле бардырыладыла.
   Аграр вузда форум эки кюнню ичинде баргъанды. Ары келгенлеге специалистле билим бериу ишни къурауну юсюнден мастер-классла бардыргъандыла, школлагъа бла сабий садиклеге тийишли бийик технологиялы оборудование чыгъарыучула уа кёрмюч къурагъандыла.
     - Быллай жыйылыуланы магъанасы - орус тилли педагогланы россей эмда битеудуния биригиуюн къурау бла байламлыды. Ол санда тюрлю-тюрлю проектлеге себеплик этген, адамны дуниягъа кёз къарамын, ангылауун школгъа дери, анда эмда бийик билим бериу кезиуледе къураялгъан устазланы да бирикдириудю», - деп белгилегенди форумну башчысы Вероника Пиджакова.
    Жыйылыуну ахырында аны бардырыугъа себеплик этгенлери ючюн вузну ректорун Аслан Апажевни, проректорун Кудайланы Русланны, «Педагогика профобучения, орус эмда тыш къыралланы тиллери» кафедраны башчысын Мадина Устованы эм «Терек бахчачылыкъ эм агъач иш» кафедраны тамата преподавателин Роза Кушхованы Вероника Пиджакова ыспас къагъытла бла белгилегенди.