Къоркъуусузлукъну жорукъларына тюшюндюредиле

Бу кюнледе Шхельда альплагерьни тийресинде жыл сайын бардырылгъан тёрели «Къоркъуусузлукъну школу» ишин башлагъанды.Проектни «Альтаир» жаш тёлю клуб бардырады.

Аны чеклеринде жаш адамла альпинистлени кереклери бла хайырланыргъа юйреннгендиле, Шхельда бузгъа, Минги таугъа  жоллада кеслерин сынагъандыла. Жууукъ кюнледе тёппелеге минерге юйренирикдиле, Башкарианский кёлге барлыкъдыла, биринчи  медицина  болушлукъ этерге тюзелликдиле.

Проектге  «Альтаир» жаш тёлю клубну эм Орус география жамауатны келечилери киредиле. Аны башчысы Мокъаланы Тенгиз адам чынтты патриот болур ючюн, бек алгъа туугъан жерин билирге керекди, дегенди. Жарсыугъа, арт жыллада черекледе бир талай адам батханды. Бир-бирде алагъа болушабыз дегенле да ёлюп кетедиле. Аны себепли сууда адам кесин къалай жюрютюрге кереклисин, бата тургъаннга болушур амаллагъа да бу проектни чеклеринде юйретедиле.