Ахча битеу жумушлагъа да салыннганды

«Единая Россияны» халкъ программасын жашауда бардырыугъа ахча бюджетге салынырыкъды. Баш магъана къыралны инсанларыны аллында борчланы толтуруугъа берилликди. Ол санда школланы, сабий садланы, саулукъ сакълау учрежденияланы жангыртыугъа, коммунал мюлкню игилендриуге энчи эс буруллукъду.

 Халкъ программаны жашауда бардырыугъа ахчаны федерал бюджетге салыуну сорууларын партияны башчысы Дмитрий Медведевни башчылыгъында тюбешиуде федерал министрле бла   сюзгендиле. 

Дмитрий Медведев айтханыча, 2024-2026 жыллада федерал бюджетге халкъ программада белгиленнген битеу жумушлагъа ахча салыныргъа тийишлиди. Баш магъана къыралны къоркъуусузлугъун, къорууланыу онгларын жалчытыугъа, энчи аскер операцияны кереклерин тапдырыугъа бериледи.

- Къыралны баш финанс документи къыйын болумда къуралады. Экономиканы айнытыу, социал ышаннгылылыкъны сакълау жаны бла мадарланы толтурургъа керекди. Партия инсанланы сейирлери неден да башха салады,-дегенди ол.

Ол айтханыча, аскер-промышленный комплексни, Сауутланнган Кючлени битеу керекле бла жалчытыу да магъаналыды. Ол санда  кадрлагъа энчи эс бурулгъанын белгилегенди партияны башчысы. «Къоруулау промышленностьну предприятиялары бюгюнлюкде кёп жумушланы толтурадыла. Алагъа салыннган борчланы толтуруугъа уа сынаулу ишчиле жетишмейдиле»,-дегенди ол.

Федерал бюджетде жангы регионлада социал проектлени тамамлаугъа ахча салыныргъа кереклисин да белгилегенди Дмитрий Медведев.

Партияны генсоветини башчысы   Андрей Турчак энчи аскер операция, тыш къыралланы жанындан басыулукъ халкъ программаны жашауда бардырыугъа чырмаула салмазлыкъларын  чертгенди.

- Айырыучулагъа толтурургъа сёз берген жумушлагъа  ахча  бюджетге салынырыкъды. Ол жаны бла Правительство эм Финансла министерство бла сёлешиуле бардырылгъандыла. Аны себепли школла, сабий садла, саулукъ сакълау учрежденияла, жолла   андан ары  ишлетилликдиле эмда жангыртыллыкъдыла. Юйлеге газны тартыу иш андан ары бардырыллыкъды, шахарла, элле айбатланырыкъдыла. Жангы регионла да   къыралны жашаууна сингдирилликдиле,-дегенди ол.

Финансла министр  Антон Силуанов билдиргенича, социал жумушланы толтуруугъа бюджетде баш магъана берилгенди.   2024-2026 жыллада федерал бюджетде партияны халкъ программасыны жумушларын толтуруугъа ахча барды.

-   Сабийлеге ай сайын тёлеулеге, кичи классланы окъуучуларын жылы аш-суу бла жалчытыугъа, класс таматалагъа тёлеулеге, айлыкъны эм аз ёлчемин кёбейтиуге финансла бардыла. Билим бериуню эм саулукъ сакълауну жангыртыу жумушла, дарманла бла жалчытыу, медицина реабилитация жаны бла иш андан ары тамамланыллыкъдыла. Шахарланы бла эллени айбатландырыу, спорт майданла, транспорт инфраструктура жаны бла проектле да тамамланыллыкъдыла,-дегенди министр.

РФ-ни Къырал Думасында КъМР-ден  депутат  Виктория Родина   KABARDIN-BALKAR.ER.RU сайтны журналистлерине федерал бюджетни къурауну юсюнден оюмун билдиргенди. Ол айтханыча,  партияны халкъ программасында белгиленнген объектлени къурулушларына  ахча «Единая Россия» Правительство бла бирге хазырлагъан тюзетиулени хайырындан салыннганды.

- КъМР-де 2022 жылда «Билим бериу» эм «Демография» миллет проектлени тамамлаугъа    3 642,23 миллион сом бёлюннгенди. Быйыл республикада халкъ программаны 20 проекти тамамланадыла. Юлгюге бир ненча тарихни  келтирирге сюеме. 2023 жылда элледе школлада спорт залланы жангыртыугъа  24 778,9 минг сом берилгенди. Къурулуш 22 объектде бардырылады.

Шахарлада болумну тапландырыугъа  227 371,1 минг сом бериледи -  жамауат солуугъа 48 жер жангыртыллыкъды.  Маданият юйлени, битеу да бирге 30 мекям, тапландырыугъа эм керекле бла жалчытыугъа уа  161 461,70 минг сом салыннганды.  Саулукъ сакълау, билим бериу учрежденияла ишлетиледиле неда жангыртыладыла. Алада тийишли жумушла къалай бардырылгъанларына депутатла къарагъанлай турадыла. Алай бла Президент Посланияда салгъан буйрукъла толтуруллукъдула деп шарт айтыргъа боллукъду,-дегенди депутат.