Айтхылы жерлешибиз юйюне къайтханды

Элбрус районну администрациясыны башчысы Сотталаны Къурман,  орунбасары Отарланы Мухтар, жер-жерли самоуправленияны таматасы Жаппуланы Руслан, жамауат организацияланы келечилери эм жууукъ-ахлулары да   Нальчикни аэропортунда  энчи аскер операцияны жигитине Атайланы   Илиясха тюбегендиле. 

Илиясны кишилигини  юсюнден биринчи кере  аслам информация органлада  быйыл апрельде  билдирилгенди.    “Ахмат” спецназны  командири  Апты Алаудинов айтханнга кёре,  “Ахмат” къауумну аскерчилери къазауат этгенлерини кезиуюнде  мекямда бегитилирге тюшгендиле.   Украинаны аскерчилери аланы тёгереклерин къуршагъанларына да къарамай,  беш кюнню ичинде  урушхандыла.  

Къыйналыргъа тюшселе да, жауну аскерни иги кесегин къырып, къолларындан къутулургъа онг тапхандыла. Айырмалыкълары бла атларын белгили этгенлени арасында Тёбен Чегемден Атайланы Илияс да болгъанды. Жарсыугъа, ол  кёзлерине ауур жарала да  алгъанды. Аны бла байламлы эки айны ичинде анга  Санкт-Петербургну  Аскер кючлерини 442-чи номерли  офтальмология  госпиталинда бакъгъандыла. Бюгюн а ол ёз республикасына къайтханды.  

Илияс айтханнга кёре, кёзлери алгъынча кёрюрлерине бек ышанып тургъанды, болсада алыкъынчы  умуту толмагъанды. Ауур жараларыны хатасындан, Дондагъы Ростовда операция этип  танг кесек  осколкала чыгъаргъандыла. 

 - Манга багъып кёз жарыгъымы къайтарыргъа кюрешген   врачлагъа ыразылыгъымы билдирирге сюеме. Саулугъума уллу заран салыннганы Аллахны буйругъуду. Насыпха, къолларым, аякъларым саудула, алай эсе, алыкъынчы  кесими сынарчама. Кёзлерим кёрюрча  бир амал табылырына муратым юзюлмегенди.  Болсада неге да къарамай, жашаргъа керекди,-  деп къошханды Атай улу.

Алгъаракълада КъМР-ни Башчысы  Казбек Коков аскерчиге не жаны бла тутхучлулукъ этиллигин, ол сана  тийишли халда багъылырча эм реабилитация бардырылырча аслам эс буруллугъун да  билдирген эди.