Биринчи медицина болушлукъ бериуге къыралны битеу инсанларын окъутургъа белгиленеди

Жангы регионланы салукъ сакълау учрежденияларында бла госпитальлада 800 медик-волонтёр эмда «Волонтёр ротаны» бла «Единая Россияны жаш гвардиясыны» 1200 келечиси ишлегендиле. Аланы сынаулары саулукъ сакълау сферада законлагъа тюзетиулени хазырларгъа болушурукъдула.

Энчи аскер операцияны аллындан бери «Единая Россия» жангы регионлада медицина болушлукъ жаны бла мадарланы къурагъанды. Бу кезиуде Донбассда, Херсон эм Запорожье областьлада россейли саулукъ сакълау учрежденияланы 2 минг врачы, медсестрасы, медицина билим алгъан студентле ишлегендиле.

 - 2022 жылда апрельде Мариупольда къазауат баргъанды, бу кезиуде уа врачланы магъанасы бютюнда уллу эди. Ол кюнледе «Единая Россия» шахарда жашагъанлагъа медицина ара ачханды. Анда ишлеген медикле сайлагъан усталыкъларына кериликни, адамлагъа къайгъырыулукъну юлгюсюн кёргюзтгендиле. Бери кеслерини ыразылыкълары бла келип ишлеген 800 медик-волонтёргъа хар бирине да ыспас сёзле айтама, - дегенди Къырал Думаны депутаты Дмитрий Хубезов.

Мариупольда, Донецкде Калинин атлы больницада, Луганскда аскер госпитальда, Херсон областьда саусузлагъа болушлукъну «Волонтёр ротаны» эм «Единая Россияны жаш  гвардиясыны» келечилери бередиле.

 - Ала жараланы байлайдыла, саусузлагъа къарайдыла, рентген кабинетледе ишлейдиле, жандауурлукъ жюкню юлешедиле. Керек болса, терк медицина болушлукъ бригадала бла бирге ишлейдиле, жаралыланы саулукъ сакълау учреждениялагъа жетдирирге болушадыла. Волонтёрла  къыйын болумлада сынау жыйышдыргъандыла. Ала фронтну тийресинде Лисичанскда госпитальда да болушхандыла саусузлагъа,-дегенди партияны жаш гвардиячыларыны башчысы Антон Демидов.

Партины башламчылыгъы бла саулукъ сакълау учреждениялада адамлагъа болушлукъ бериуге   окъутуу къуралгъанды. Ала врачла, медсестрала, медицина вузлада окъугъан студентле биринчи болушлукъ бериуню шёндюгю амалларын биледиле.  Аскер медицинада жетишимлеге башхаланы да юйретирге керекди, деп акъыл этеди Дмитрий Хубезов.

Депутат кеси ыразылыгъы бла фронтха юч кере атланнганын айтырчады. Ол СВО башланнган кюнден бери Донбассда волонтёр медиклени  ишлерин бирге тийишдиреди. Фронтха мобилизация башланнганлай кетгенди, Луганскда госпитальда ишлегенди. Майны ахырында уа аны Къырал Думаны саулукъ сакълау комитетини башчысыны къуллугъундан эркин этиуню юсюнден тилекни жазып, фронтха къайтханды. Ол энчи операцияны кезиуюнде жыйышдыргъан сынауну мурдорунда биринчи медицина болушлукъ бериу жаны бла законлагъа тюзетиуле хазырланнгандыла.   

 - «Саулукълу келир заман» проектни жашауда бардыргъанла бла бирге партияны халкъ программасына жангы болумла кийирирге мурат этебиз. Сёз къыралны инсанларын биринчи медицина болушлукъ бериуню жорукъларына юйретиуню юсюнден барады, - дегенди ол.

 Окъутууну бирикдирилген программаларын жарашдырыугъа, устазланы хазырлаугъа, шёндюгю сынауланы сингдириуге РФ-ни Саулукъ сакълау министерствосу жууаплыды.

 Партияны КъМР-де регион бёлюмюню толтуруу комитетини башчысы Дмитрий Парафиловну айтханына кёре, медикле-волонтёрланы регион штабыны келечилери да жангы регионлагъа болушлукъну жумушларына тири къатышадыла.

- Ала пандемияны кезиуюнде иги сынау жыйышдыргъандыла, адамлагъа къайгъырыулукъну юлгюсюн кёргюзтгендиле. Бюгюнлюкде уа «Биз биргебиз» къымылдауну чеклеринде республикагъа къачхынчылагъа себеплик этиледи. Энчи аскер операциягъа къатышханлагъа бла аланы юйюрлерине болушлукъну юсюнден айтханда, бу жаны бла магъаналы жумушла толтуруладыла. Партияны волонтёр арасыны регион бёлюмюнде Къабарты-Малкъар къырал университетни медицина колледжини окъуучулары уа жандауурлукъ жюкню къураргъа болушадыла, - дегенди Дмитрий Парафилов.