Иш бериучюле бла бетден-бетге тюбешиу хайырлыды

Бу кюнледе  «Къабарты-Малкъар гуманитар- техника колледжни» профессионал билим берген арасында иш бла жалчытыуну Битеуроссей ярмаркасыны экинчи кезиую бардырылгъанды.  Ол энчи орта профессионал  билим берген эмда  мектеплени  быйыл бошап чыкъгъан жаш адамлагъа  деп къуралгъан эди.

Араны  майданларында  КъМР-ни  Иш бла жалчытыу эмда социал болушлукъ бериу министерствода,  «Адамланы иш бла жалчытыу эмда социал къоруулау жаны бла республикалы арада» ишлегенле да  болгъандыла. Ала  300-ден артыкъ вакансияны,  ишге къалай тохтаргъа кереклисини юсюнден болумланы эм дагъыда  профессионал хазырлыкъны  болумларыны юсюнден да  ары келген жашлагъа бла къызлагъа тынгылы хапар айтхандыла. Андан сора да,  къошакъ халда окъуу-методика арада ишлегенле  къыяулу, сакъат адамла ишсиз къалмаз ючюн деп, алагъа жараулу квоталаны юсюнден да хапар билдиргендиле.

Ярмарканы кезиуюнде мастер-классла,  усталыкъгъа юйретиу жаны бла  тюрлю-тюрлю программала да  болгъандыла.

Иш излеген жаш адамланы иги кесеги  ол кюн билим бериу учрежденияланы интерактивный майданларына аслам эс бургъандыла. Андагъы хал ол неда башха ишде керекли  специалистлени юйретиуге бурулуп эди эмда    «Профессионалитет» Федеральный проектге тийишлиликде «Право сакълау эмда управление»  деген жаны бла ишге юйретиуню юсюнден тынгылы  билдириу бара эди. Бу проект республикада жашауда биринчи кере бардырылгъанды, анга да къарамай, кёп жаш адамланы эмда аланы ата-аналарыны эсин кесине бурдургъанды. Ол проектге тийишлиликде окъургъа, усталыкъ алыргъа  ыразылыкълары болгъанла  жарыкъ эмда шёндюгю заманнга кёре, хар не кереклиси бла жалчытылыннган  класс кабинетледе юйренирге онг табарыкъдыла эмда ала иш бериучюле бла  окъуу процессни кезиуюнде дайым да тюбешип турлукъдула.

Проектни баш магъаналы борчу, жангы программаланы жашаугъа бардырыуда практикада ишлерге боллукъ кадрланы хазырлауду,  наставничество институтну айнытыуду, ишге тохтарча себеплик этиуде болушууду. Ма ол хыйсапладан ярмаркаланы къурау, аланы кезиуюнде иш бериучюле бла бетден-бетге тюбешиу, майданлада мастер-классланы бардырыу, ол не да башха ишни юсюнден тюрлю-тюрлю  консультацияла  этиу  бек магъаналыдыла. Бу жол битеу да ярмаркагъа  жети жюзден аслам адам къатышханды. Кёпле кеслерине иш да тапхандыла.