Ставропольну юристлерини регион ассоциацияларында «Россейни айырыу системасына 30 жыл: тарыхы, шёндюгю болуму, айныу амаллары» деген темагъа халкъла аралы илму-сынам конференция болгъанды, ол къыралны айырыу системасына 30 жыл толгъанына аталып къуралгъанды. Аны бардырыугъа себепликни Россейни юристлерини ассоциациясы бла «Знание» къырал общество этгендиле.

Жыйылыугъа алимле, Россейни регионларындан жамауат ишчиле, вузланы преподавательлери, айырыу эркинликле жаны бла экспертле къатышхандыла. Къабарты-Малкъардан анда Жамауат палатаны жамауат къоркъуусузлукъ, законлукъну сакълау эм ОНК-бла байламлыкъла жюрютюу комиссиясыны башчысыны орунбасары, юридический илмуланы кандидаты  Къараланы Расул бла Россейни юристлерини ассоциацияларыны регионда аппаратыны башчысы-толтуруучу директору Азрет Шапсигов болгъандыла. 

Конференцияда сентябрьде боллукъ айырыула тынч ётмезликлерин белгилегендиле. Россейни Жамауат палатасыны келечиси Алёна Булгакова къыралны жангы регионларында да уллу кампанияла къуралырыкъларын, ол а жамауат контрольгъа къошакъ жууаплылыкъ салгъанын белгилегенди. 

Жыйылгъанла айырыулагъа жаш тёлюню да тири къатышдырыуну темасын да кётюргендиле, регионлада эм иги сынамлагъа къарагъандыла. Къараланы Расул чертгенича, конференцияланы бусагъатда ётдюргенлери ахшыды. «Анда кёп соруу тинтилгенди, кеси да тынгылы къуралгъанды. Кесими сынамыма кёре айтайым, адамланы айырыу эркинликлерине юйретиуню, бу жаны бла жарыкъландырыу ишни айырыу кампания башланнгынчыгъа дери иги кесек заман алгъа башларгъа тийишлиди. Жамауат къараучулагъа методика материалланы жарашдыргъанда да башха регионлада болгъан ишлени эсге алыргъа керекди», - дегенди ол.

Жыйылгъанла «Россейни – мени тарыхым» музей-кёрмюч комплексде айырыу системаны 30-жылыгъына аталгъан экспозициягъа да къарагъандыла, Ставропольну къырал тарых-маданият музейинде да болгъандыла.

Конференцияны эсеплерине кёре резолюция жарашдырылгъанды, деп билдиредиле Къабарты-Малкъарны Жамауат палатасыны пресс-службасындан.