Жаланда врач бакъмайды саусузну

Саусузну жокълай келген жууукъла багъыугъа заран тюшюредиле. Нек? Врач жаулу, къууурулгъан затла ашамагъыз, диета аш бла хайырланыгъыз дегенликге, бизде ол сёзлеге эс бурмайдыла. «Больницагъа саусузну жокълай барыуну жорукълары барды», - дейди психолог Муртазланы Фаризат. 

Больницада неда юйде болсун, бизни бек къаршы эмда биз бек сюйген жууукъларыбызны – сабийлерибизни, атабызны, анабызны, юй бийчелени, баш иелени  бир затлары ауругъанлай, къайда не багъа зат бар эсе да тюкенде, аны сатып алабыз. Врачха соргъаныбыз-сурагъаныбыз болмай. Ол терсди. Жаланда врач айтханны алыргъа керекди. Хау, биз саусузларыбызны къатларында олтурабыз, айтханларын жерге салмай этебиз.Ол тюздю. Алай кавказ менталитетибизни унутуп, врачны оноуларына сыйыныргъа керекбиз, хычин, къой эт керекмей эселе саусузгъа, элтмегиз. Жаланда какны буюргъан эсе доктор, аны бла чекленигиз.

Биз бек жууукъларыбызгъа чабып баргъанлыкъгъа больницагъа, узагъыракъ жууукълагъа, танышлагъа жетгенде,  заман табылмай къалады. Ол жумушха эки-юч сагъатны бёлюрге, къалай эсе да, онг чыкъмайды. Жыл саныбыз жетип, кесибизни да аурумагъан жерибиз жокъ эсе уа, шахарны бир къыйырындан башхасына баргъан алай тынч тюйюлдю. Андан сора да, саусузну инжилгенин кёрюп, кесинг да къыйналаса.

Аны анга билдирмез ючюн не этейим? Жапсарыр ючюн не айтсам иги боллукъ болур? Ол къууанырча не зат элтейим? Аз келтирсенг, сени къызгъанч сунарла, дунияны алып барсанг а – энди келмез ючюн этеди алай, дерле…

Саусузну кёре бармагъаныгъыз ючюн уяла эсегиз, тынчлыкъ тапмай эсегиз, телефон бла сёлешигиз да, анга не керек болгъанын билигиз. Дарман алайыммы, бош тургъан юйюнге къарайыммы, гюллеринге суу къуяйыммы,деп соругъуз. Адам кеси жангыз жашай эсе, анга керти окъуна болушлукъ керек эсе, ол аны букъдурлукъ тюйюлдю. Сиз да бошуна заманымы тас этдим, деп сокъуранмазсыз.

Адам жууугъу неда танышы ауругъанда кесин къалай жюрютюрге билмей, арсарлы болса, кесин больницада жатхан заманын эсине тюшюрюрге керекди. Дуния бла бир сумкала, бузула тургъан кёгетле, жемишле… Сизге ашны айырып ашаргъа керек болгъан заманда къыймала, къатхан, къууурулгъан этле, татлы затла уа? Саусузну кёре келгенле, аны юсюнден  сагъыш этмей, кеслерине къалай тап эсе да, алай этедиле, деп келеди кёлюнге бирде.

«Аз да онг болгъанлай, саусузгъа не зат жарагъанын бла къалгъанын билигиз, - дейди Муртазланы Фаризат.-  Бир зат да керекмейди»,-деп эшитгенден сора да, къурулай барыргъа уяла эсегиз, ашны орунуна сейирлик журналла, эрикгенни кетериучю оюнла элтигиз. Алай бла сиз жууукъ адамыгъызгъа, тенгигизге хурмет этгенигизни, сюйгенигизни, тансыкъ болгъаныгъызны билдирликсиз. Саусузгъа ол ауругъанын бир ауукъ заманнга унутурча неда сиз аны терк сау болуп чыгъарыгъыгъызны бек сюйгенигизни билдирирча  затланы келтиригиз. Алай а оздуруп къоймагъыз! Инфаркты болгъан уллайгъан тиширыугъа ариу жаулукъ неда шарф келтирип берирге боллукъду, больницадан чыкъсанг, хауада быланы къысып айланырса деген магъанада. Спорт кереклени саугъаларгъа уа алыкъа эрттеди. Сёлешген кезиуюгюзде, жууукъ заманлада бирге театргъа барыргъа келишигиз, артда  жолоучулукъгъа чыгъарбыз деп, аны да маршрутун сайлагъыз. Палатагъа неда фатаргъа кирирни аллында чам, кюлкюлю хапарланы эсигизге тюшюрюгюз. Саусуз сиз сюйгенча харх этип кюлмесе да, ауругъанын а бир кесекге унутурукъду. Ма ол заманда сиз бошуна келмегенигизге бир да ишекли болмагъыз».

Жер башында аурумазлыкъ жокъду. Саусузну къатында кесибизни тап жюрютюрге керекбиз, психологланы айтханларын эсге алып. Кёбюсюнде саусузла жууукъланы-тенглени болушлукълары бла сау болуп кетедиле. Жаланда врач бакъмайды аны, къатында адамланы билеклик этгенлери да бек болушады.