Жандауурлукъ – аны баш ышаныды

Кисловодск шахарда Велинградская 19 деген адрес бла бир жыл мындан алгъа таулу тиширыу  Текуланы Светлана  ашхана ачханды. Хар шабат кюн сагъат онекиден ингирликде оналтыгъа дери социал болушлукъ керекли адамланы ол хакъсыз  кафесинде сыйлайды.  Ала уа бек кёп  келедиле. Аланы барына да  Светлана эмда аны  башламчылыгъында ишлегенле  жетер чакълы аш-суу этедиле.

Аны юсюнден бизге Кисловодск шахарда жашагъан Елена Самозванцева билдиргенди.

  Ол айтханнга кёре, Светлана къарыусуз, жангыз къалгъан, болушлукъ керекли адамланы хакъсыз багъып тургъанлы, алагъа кийимле бла болушханлы да  бу кюнледе жыл болгъанды. «Биз аны  ол гитче байрамы бла къызыу алгъышлайбыз. Бу дунияда жашагъан ким да къолундан келгенича къарыусузлагъа, жангызлагъа, амалсызлагъа болушсала, дуния бютюн ариу, бютюн жарыкъ боллукъду.  Уллу кёллюлюк бизден кери кетсин. Светланача огъурлу, халал жюрекли адамла жер башында не къадар кёп болсала, жашау да ол къадар монглу, ариу боллугъуна  мен ийнанама.  Не десек да, Светланача  адамланы хайырындан  башхаланы мутхуз жашаулары бир кесекге окъуна  жарыкъ бояулу боладыла. Текуланы къызны  кесине уа, кюн сайын да жашауунгда амалсызлагъа болушлукъ этерге къолунгдан келирча насыплы, узакъ ёмюрлю  бол, дейбиз. Жашауунда   социал болушлукъ керекли адамлагъа жарагъандан уллу къыйынлыкъ сынамасын. Анга керек болгъанда уа, башхала да терк жетерча  насыплы болсун», дейди  Елена.