Энчи аскер операциягъа къатышханлагъа себепликге

Сабийлери болгъан юйюрлеге къырал себеплик, электрон тютюнлени сатыу, энчи аскерчи операциягъа къатышханла. Статьяда июньда кючюне къаллай федерал законла киргенлерин ангылатабыз.

Энчи аскерчи операция

 Аскерчи энчи   операциягъа ашырылса, ол санда Россейден тышына, аны юйюрю къырал берген журтда  къалыргъа эркинди. Дагъыда ёксюз сабийлени къауумундан аскерчилеге жашау журтла биринчилени санында берилликди.  СВО-гъа къатышханла россейли паспортну, машинаны жюрютюрге праваланы жангыртхан кезиуде къырал тёлеуден эркин этиледиле.

НДФЛ

Сабийлери болгъан юйюрле жерни сатхан кезиуде налог тёлерик тюйюлдюле. Дагъыда эки эм андан кёп сабийлери болгъан юйюрле фатарны, журтну сатханда НДФЛ-ден эркин этиледиле, ала ахчаны жашау болумларын игилендириуге къоратырыкъ эселе.

НДФЛ регионну эм жер-жерни бюджетине биринчилени санында ётдюрюллюкдю. Бу жангычылыкъ регионланы ахча бла чырмаусуз жалчытыугъа бурулупду. 

 Электрон тютюнле

Электрон тютюнлени энди жаланда тюкенледе сатаргъа эркин этилгенди. Аланы ярмаркалада,  кёрмючледе, автоматланы болушлукълары бла, интернетде сатаргъа чекле салыннгандыла. Аны бла бирге кальянны, электрон тютюнлени адамла кёрюрча ачыкъ жерледе орнатыргъа да жарарыкъ тюйюлдю.

 Тутмакъланы эркинликлери

Законланы бузгъанлары ючюн тутмакълада тутулгъанланы эркинликлери къалай сакъланнганларын жамауат контрольну тамамлагъан организацияланы тизмеси кенгертиледи.  Жамауат биригиуле, союзла, фондла, коммерциялы болмагъан автоном организацияла къошулургъа боллукъдула бу жумушлагъа. Жамауат комиссияла къырал эм жер-жерли власть органладан жалынчакъсыз болгъанлары да жазылгъанды законда.

Тутмакъланы терсликлерине жолукъдуруу федерал службаны колониялада школланы къураргъа эркинликлери сакъланнганды.  Ала тутмакъланы окъутуугъа битеулю билим бериу организацияланы келечилери бла келишим къабыл кёрюп къошаргъа боллукъдула.

Айырыула

Энчи аскерчи низам кийирилген регионлада   референдумла, къырал эм жер-жерли власть органлагъа айырыула РФ-ни Къоруулау министерствосуну бла ФСБ-ны эркинликлери болгъан кезиуде бардырыллыкъдыла. Бу жангычылыкъ Донецк эм Луганск халкъ республикалада бла Херсон эм Запорожье областьлада айырыуланы жалчытыр мурат бла хазырланнгандыла.

 Товар белги

29 июньда кючюне кирлик федерал закон хар инсанннга да кесини товар белгисин эсепге салыргъа эркинлик береди. Бу онг бла кеслерин иш бла жалчытханла, инсан келишимлеге кёре жумушланы толтургъанла хайырланыргъа боллукъдула. Алгъын а товар белгини  жаланда энчи предпринимательле бла организацияла жарашдырыргъа эркин  болгъандыла.

Басмагъа Тикаланы Фатима хазырлагъанды.