«Элбрус» курортну айнытыуну онглары сюзюлгендиле

КъМР-ни Башчысы Казбек Коков  бла РФ-ни экономиканы айнытыу министрини орунбасары Сергей Назаров бу кюнледе бардыргъан кенгешде жыл узуну ишлеп тургъан «Элбрус» турист-рекреация комплексни айнытыуну онглары сюзюлгендиле.

Тюбешиуге КъМР-ни Правительствосуну Председатели Мусукланы Алий, РФ-ни Президентини СКФО-да толу эркинликли келечисини орунбасары Владимир Надыкто,  Кавказ.РФ-ни башчысы Андрей Юмшанов,  федерал министерстволаны бла айнытыуну институтларыны, «Элбрус» ВТРК-ны келечилери да къатышхандыла.

Казбек Коков Россейни Экономиканы айнытыу министерствосу республикагъа не жаны бла да тутхучлулукъ этгени ючюн Сергей Назаровха жюрек ыразылыгъын билдиргенди.  Регионну Башчысы Кавказ.РФ кёп жаны бла, ол санда туризм жаны бла да, бирге ишлеуню хайыры уллу болгъанын чертгенди.

Сергей Назаров а республиканы Правительствосу бла бирге Элбрус курортда туризмни инфраструктурасы айнытыллыкъ тийрелени планларын жарашдырыу иш ахырына жетдириле тургъанын билдиргенди. Ишленирик объектлеге излемле тохташдырылгъандыла, лыжалада учууну онгларын игилендиртиу жаны бла иш барады, дегенди.

Эсигизге салайыкъ, Россейни Правительствосу Элбрусда дуния даражалы тау-лыжа курорт къурауну проектин аз-аздан тамамлай барады. 2022 жылда аны 580 минг чакълы турист жокълагъанды. Ол а  аны аллындагъы жылдан 48 процентге асламды. Энди  инвестицияла болумну игилендире барыугъа энчи эс буруллукъду. Инфраструктура тынгылы болса, «Элбрус» курортну инвестиция онглары да кёбейирикдиле.

Кавказ.РФ-ни баш директору Андрей Юмшанов билдиргеннге кёре, къурулуш эмда жер-ырысхы бла байламлы оноула чыгъарылгъандыла,  тийрелени планлары бла байламлы документле 24 апрельге дери республиканы Правительствосуна жиберилликдиле. Энчи экономика тийрелени тёртюсюне 15 уллу инвестор эс бурур деп сакъланады.

Алай туризм – инвестиция жаны бла сейирсиндирлик жангыз объект тюйюлдю. Республикада Тырныауузда вольфрамны бла  молибденни къазып башлауну стратегиялы магъанасы болгъан инвестициялы проект бардырыла турады. Сергей Назаров анга  бёлюннген ахчагъа къошаргъа деп оноу этилгенин билдиргенди. Ол тамамланса, 1200 ишчи жер къуралыргъа боллукъду.

-Бу айны ахырына дери Тырныаууз бла байламлы ишни ахырына жетдирликбиз.Жаланда Директорланы советини оноуун сакълайбыз. Кредитле комитети бла ВЭБ, эмда ВТБ да акъылларын билдиргендиле, - деп къошханды министрни орунбасары.

Къыралны себеплиги бла регионда дагъыда агропромышленность комплексде, жашау журтланы къурулушунда, IT-технологияла жаны бла да инвестиция проектле тамамланыладыла. 

Сергей Назаров ол кюн республиканы бизнесменлери бардыргъан тюбешиуде да сёз инвестицияланы юслеринден баргъанды. Анда жер-жерлени планларын жарашдырыуну, инфраструктураны ким да хайырланырча этиуню, ишчи онгланы, орта эмда гитче предпринимательликге себеплик этиуню, кредитлени эмда кёп башха затланы юслеринден да сёлешиннгенди.

Тюбешиу ачыкъ ушакъ халда ётгенди эмда майда Кавказны инвестиция кёрмючюнде андан ары бардырыллыкъды, деп билдиргендиле КъМР-ни Башчысыны бла Правительствосуну пресс-службасындан.