Ал жанында – жоллада къоркъуусузлукъну сакъалу

«Жолда жюрюуню къоркъуусузлугъу» федерал программаны жумушларын жашауда бардырыуну чеклеринде КъМР-де Ич ишле министерствода   кенгеш   къуралгъанды.  Аны министрни къуллугъун толтургъан Назир Мамхегов бардыргъанды. Тюбешиуге федерал инспектор Тимур Макоев, сейирлери болгъан министерстволаны бла ведомстволаны келечилери къатышхандыла.

Назир Мамхегов кемчиликлени, жарсыулу болумланы юслеринден айтханды, тюбешиуню ача. Аланы арасында водительле законланы билмегенлерин, низамсызлыкъны, жууапсызлыкъны кёргюзтгенлерин белгилегенди. Бу жаны бла ангылатыу жумушланы бардыргъан органланы ишлерин тирилтирге, жамауатха жолда жюрюуню жорукъларын   ачыкълау жумушланы игилендирирге кереклисине эс бургъанды.

Сёз «КъМР-де жолда жюрюуню къоркъуусузлугъу» проектни ахча бла жалчытыуну, трассалада Катастрофаланы медицинасыны машиналары тургъан жерлени кенгертиуню, муниципалитетледе терк медицина болушлукъ бериу службада ишлегенлени билимлерин ёсдюрюуню юслеринден баргъанды.

Сабийлени къоркъуусузлукъларын сакълауну сорууларын да сюзгендиле. Тюбешиуге къатышханла билим бериу учреждениялада ангылатыу ишни тирилтиуню, «Жолда къоркъуусузлукъну жаш инспекторлары» жаш тёлю жамауат биригиуню айнытыуну, жаш адамланы машинаны жюрютюрге юйретген школну къурауну, автогородокну тапландырыуну юслеринден оюмларын айтхандыла.

Дагъыда жолдан жаяу ётерге эркин этилген жерлени къурауну, къурулушла бардырылгъан жерледе къоркъуусузлукъну жалчытыуну, пассажирлени жюрютюуде низамлыкъны сорууларына да къаралгъанды. Жолда жюрюуню жорукъларын сакъламагъанланы терсликлерине жолукъдурууну юсюнден да айтылгъанды. Низамлы, бузукълукъла этмеген водительлени кёллендирирге кереклисин да белгилегендиле тюбешиуге къатышханла. Сёзге, культура жумушлагъа билетле саугъалап.

Жыйылыу жолда жюрюуню къоркъуусузлугъун жалчытыугъа бурулгъан эсгертиулени къабыл кёрюу бла бошалгъанды.