Туризмни айнытыугъа аслам эс

Россей Федерацияны правительствосуну Координация арасында бардырылгъан видеоконференцияда бизни къыралда туризмни эмда аллай инфраструктураны айнытыуну юсюнден сёлешгендиле. Ушакъгъа вице-премьер Дмитрий Чернышенко, экономиканы айнытыу министр Максим Решетников, Правительствону, Къырал Думаны, регионланы келечилери, ол санда КъМР-ни экономиканы айнытыу министри Рахайланы Борис да къатышхандыла.

Баш тема «Туризм эмда къонакъбайлыкъ индустрия» миллет проектни тамамлау болгъанды. «Президентни буйругъу бла этиле баргъан ишле туризмни айнытыугъа иги себеплик этедиле. Сёз ючюн, быйыл аны оноуу бла уллу туроператорланы НДС-ден эркин этерге сюебиз. Дагъыда энчи къорууланнган табийгъат тийреледе туризм бла кюрешиуню энчиликлерини юсюнден законнга къол салыннганды. Тийишли миллет проектни чеклеринде, отельле эмда модуль халда къуралгъан къонакъ юйле сюерге себеплик этер хыйсап бла ахча бла жалчытыу программа жангыдан ишлеп башларыкъды. Болгъан онгланы эмда жангы амалланы эсге алып айтсакъ, бёлюм сакъланырыкъды деген угъай, иги айнып барлыкъды деп алай сунабыз», - дегенди Максим Решетников.

Депутатла, Экономиканы айнытыу министерствону келечилери да электрон путёвканы теркирек хайырланыугъа бериуню, Кърымда туризм бизнесге къошакъ халда себеплик этиуню, къонакъ юйлени юсюнден законну жик-жиги бла хазырлауну, регионлагъа да черекледе туризмни айнытыргъа билеклик этиуню юслеринден хапарлагъандыла.