Сатыу-алыу бла кюрешгенлени таянчагъы

Сбербанк бизни республикада гитче предприятиялагъа эмда энчи предпринимательлеге былтыр 1,3 минг кредит бергенди. Ахча бла тергегенде, ол 2,5 миллиард сом бола кетеди. Тенглешдирип айтханда уа, буруннгу жылны кёрюмдюсюнден онеки процентге асламды, деп билдиргендиле КъМР-ни Экономиканы айнытыу министерствосундан.

«Гитче эмда орта бизнес республикада банкла берген онгланы толусунлай хайырланадыла, ахчаны производстволарын кенгертиуге, жангы предприятияла ачаргъа жибередиле. Россейни Экономиканы айнытыу министерствосуну, «Гитче эмда орта предпринимательство сора дагъыда энчи предпринимательстволу башламчылыкъгъа себеплик этиу» миллет проектни чеклеринде бардырылгъан 1764 Программасына тийишлиликде, былтыр 169 кредит келишим этилгенди. Бары да 1,5 миллиарддан аслам сом багъасын тутадыла. Бу кёрюмдю кеси да андан ары кёбейе барыргъа ушайды», - дегенди КъМР-ни экономиканы айнытыу министри Рахайланы Борис.

Сагъынылгъан банкны гарантияла бериу сферада кёрюмдюлери андан да игидиле: бир жылны ичинде аланы саны эки кереге кёбейгенди, ахча бла тергегенде уа ючден бирин къошуп, 300 миллион сомдан атлагъанды. Аллай гарантияланы 99 процентин хайырланыучу сёлешгенден сора талай сагъатны ичинде тамамлагъанды Сбербанк. Ол а жалгъан интеллект амалны хайырындан болгъанды.

«Гитче предпринимательство Къабарты-Малкъарны экономикасын айнытыуда баш жерледен бирин алады. Аны бла кюрешгенлеге Сбербанк да билеклик этеди. Ол а: ахча бла жалчытыу, финанслагъа саналмагъан къадар сервисле эмда жумушла. Ала бары да бизнес бла кюрешгенлеге ишлерин бютюнда иги, къыйматлы этерге, къоранчларын азайтыргъа болушадыла, жангы онгла бередиле», - дегенди финанс учрежденияны Къабарты-Малкъарда бёлюмюню башчысы Залина Бейтуганова.

Бюгюнлюкде гитче предприятиялагъа бла энчи предпринимательлеге Экономиканы айнытыу эмда Эл мюлк министерстволаны, Кавказ.РФ-ни, банкны эмда аны партнёрларыны жанындан кёп тюрлю онгла бериледиле. Ала Сбербанкдан гарантияны офисге бара айланмай, онлайн халда алыргъа боллукъдула.

«Къабарты-Малкъарда бизнес бла кюрешгенлени кёп жылланы ичинде ышаннгылы шуёхуду банк. Ол берген онгланы хайырындан кёпле кеслери иш ачхандыла, аны айнытхандыла. Бу финанс учреждение къыралны себеплик этиу программаларыны аслам кесеги бла ишлейди, кесини кредит продуктлары эмда сервислери бла жалчытады. Бюгюннгю Сбербанк, айтханымча, бизнесни ышаннгылы таянчагъыды», - деп чертгенди «ОПОРА России» организацияны республикада бёлюмюню башчысы Альберт Кильчуков.