Профилактика ишлеге, законлукъну сакълаугъа тири къатышхандыла

МВД-ны Къабарты-Малкъарда управлениясында Жамауат советни шёндюгю къауумуну ахыр жыйылыуу ётгенди. Анга КъМР-ни ич ишле министри полицияны генерал-лейтенанты Василий Павлов къатышханды.

Жыйылыуну кезиуюнде Жамауат совет ишлеген кезиуюнде не жумушла тындырылгъаны айтылгъанды. В. Павлов советни келечилерине тамамлагъан ишлери ючюн жюрек ыразылыгъын билдиргенди.

- Юч жылны ичинде сиз ведомство бардыргъан профилактика жумушлагъа, къырал автоинспекцияны, участковыйле бла акъылбалыкъ болмагъанланы ишлери жаны бла инспекторланы рейдлерине, наркотиклени законсуз сатыу-алыугъа къажау бёлюмню ишине тири къатышып тургъансыз, андан тышында да кёп башха проблеманы кетериуге къошумчулукъ этгенсиз.   Сизни быллай ишлеге къатышханыгъыз биз жамауатны аллында ачыкъ болгъаныбызны кёргюзтгенди. Мындан арысында да арабызда бу келишиулюк сакъланырына эм кючленирине ышанама, - деп чертгенди министр.

 Ызы бла Василий Павлов жаш тёлюню Ата журтха сюймекликде ёсдюрюу, полициячылагъа гражданланы законлу сейирлерин эм эркинликлерин сакълагъан адамлагъача кёз къарамны тохташдырыу, алагъа жамауатны жанындан ышаныуну ёсдюрюу жаны бла уллу иш толтурулгъанын белгилегенди. Ведомствону таматасы юлгюге Совет Союзну Жигити Калюжный Николай Гавриловични атын жюрютген Нальчикни 7-чи орта школунда къуралгъан кадет къымылдау къуралгъанын, анга «Громну» командири полицияны полковниги Владислав Кашироковну берилгенин айтханды. «Битеу ишлеген жылланы сиз ол къымылдаугъа болушлукъ этип тургъансыз. Былайда энчи мектепни юйретиу жаны бла завучу Зарема Ципинованы да белгилерге сюеме», - деп къошханды В.Павлов.

Ызы бла советни башчысы Руслан Макушев 2023 жылны биринчи кварталында этилген ишлерини эсеплерин чыгъаргъанды, андан сора алагъа бусагъатда салыннган борчлагъа къаралгъанды.

Жыйылыуну ахырында министр Василий Павлов къууанчлы халда советни келечилерине жамауатны ишлерине тири къатышханлары эм профилактика жумушланы тамамлауда этген башламчылыкълары ючюн Руслан Макушевге сыйлы грамота, советни келечилерини барысына да ыразылыкъ къагъытла бергенди, деп билдиредиле КъМР-де МВД-ны пресс-службасындан.