«Кесине ийнаныулукъну кючю уллуду»

Бусагъатдагъы жаш тёлюбюз кесини жетишимлери бла къууандыргъанын бек магъаналы шартладан бирине санайма. Кёп тюрлю ишледе билимлиликлери, хунерлери бла да алдадыла. Ма аллайладан бириди Ахметланы Баширни жашы Артур да. 

Ол студент жылларында окъуна кёп тюрлю конкурслада, эришиуледе алчы болуп тургъанды, тирилиги ючюн сыйлы грамоталагъа да тийишли болгъанды. Бюгюнлюкде уа КъМР-ни жаш тёлюню ишлери жаны бла министрини орунбасарыды. Бюгюн ол ушакъ нёгеримди.

- Артур, жаш тёлюню болумуна не кёзден къарайса?

- Шёндю айныргъа, билиминги, хунеринги кёргюзтюрге кёп амалла бардыла. Жаланда жаш адамланы кеслеринден къаллыкъды, ансы къырал хар жаны бла да онг береди. Федерал буйрукъла, регионда къырал программа аланы айныуларына себеплик этедиле. 

- Сени оюмунга кёре, жаш адамла жашауда кеслерини жерлерин табаламыдыла?

- Арт заманда кёпле, кеслерин жалчытып, онгла табып, бирер жерде урунадыла. Хау, хар адам да бирча жетишалмайды, бирле  кеслерини жерлерин табадыла, бирле уа мёхеллик этедиле. Баям, жашау халла да чурум эте болурла. Алай тёгерекни терслерге ол сылтау тюйюлдю. Бирде адам кеси кесине соруу берирге керекди: «Мен а не этгенме жашауум былай болмаз ючюн?». Адамны кесинден кёп зат къалады.

- КъМКъУ-да Отарланы Керим атлы малкъар маданият араны башчысы болуп тургъанса. Не ишле тындырыр онг болгъанды ол кезиуде? 

- Университетни башчылары да хар башламчылыгъыбызгъа амал тапдыра эдиле. Мени баш борчум жаш тёлюню республиканы жамауат ишине къатышдырыргъа, тилни, адет-тёрелени сакълауда эди. Анда ишлеген кезиуюмде эки жюзден артыкъ студентни Малкъар маданият араны ишине къатышдырыр онг болгъанды.  Кёп конкурслада алчыла болуп тургъанбыз. Эсде къалгъан ишлерибизден бири – айырмалы студентлени окъууну бошагъанлары бла алгъышлау байрамыбыз эди. Ол иш кёп студентни иги окъургъа кёллендиргенди, асламысыны эсинде къалгъанды.

Андан тышында да, школла бла да кёп иш этгенбиз, байламлыкъ жюрютгенбиз. Бюгюннгю кюнде, жангы излемлеге кёре, жаш тёлю бла алай ишлерге кереклиси баямды. Жаш адамла бла бир тилде сёлеширге, аланы не къайгъылары болгъанын ангыларгъа кереклисин энчи чертирге сюеме.  Анга заман керекди. Бир кюннге болунуп къаллыкъ иш тюйюлдю. Эринмей, эрикмей, кюреширге тийишлиди. Быллай ишде бирлик керекди.

- Студентле тиллерин билемидиле? Маданият араны ишине тири къатышамыдыла?

 - Маданият ара – тилни, адет-тёрелерибизни сакълауну жериди. Къарачай-малкъар кафедра аны айныууна уллу къыйын салады. Студентле да тири къатышадыла аны ишине, ол къууандырады. Болсада бир -бирлеге къыйынды ары келген, нек дегенде анда ана тиллеринде сёлеширге тюшеди, андан тышында уа – орусча. Ол себепден, ангылатыуну аз-аздан бардырыргъа керекди. Жаш тёлюге ийнаныулукъ, ышаныулукъ бек магъаналыды.

- Къырал жаш адамлагъа къалай болушады?

- Арт жыллада жаш тёлю политикагъа уллу эс бурулады къыралда. Энчи арала, ишчи жерле, спорт бла кюреширча амалла эм кёп тюрлю башха ишле къураладыла. Къуру бизни республикада окъуна быйыл жаш тёлюге деп юч биригиу ачыллыкъды. Анда окъургъа, маданият бла кюреширге да юйренирикдиле. Элде грант алыр амалла да къураладыла. Жаш юйюрлеге къыралдан болушлукъ тапдырылады.

- Не муратларынг бардыла? 

- Баш муратым – халкъгъа, къыралгъа жараргъады. Анга итиннгенлей барлыкъма.

- Министерствода иш къалай барады?

- Бу бёлюмде мен акъылбалыкъ болгъанлы бери ишлейме. Аны себепли ишиме сюйюп барама. Жаш телюню айныууна бир къошумчулугъум болгъаны окъуна кёллендиреди. Жангы министерство къуралгъанлы жыл да болмайды, алай кёп иш тындырыргъа къолубуздан келеди. Жаш тёлю политика айный баргъаны хакъды.

- Жаш тёлюге не айтыргъа сюесе?

- Айныргъа итинигиз! Окъуугъа уллу эс бёлюгюз. Сизни ючюн деп бардырылгъан жумушлагъа тири къатышыгъыз. Бир бирге билеклик этерге кюрешсегиз, къолугъуздан не зат да келликди. Сагъышларыгъыз а деменгили затны юсюнден болсунла.

- Сау бол, Артур, ишингден къууан!