Сабийлени солууларын къурауну амалларына къаралгъандыРФ-ни Федерал Жыйылыуунда Законла чыгъарыучуланы советини социал политика жаны бла комиссиясыны кезиулю жыйылыуу видеоконференция амал бла бардырылгъанды. Аны ишине КъМР-ни Парламентини спикери Татьяна Егорова къатышханды. Анда сёз 2023 жылда жай солуу кезиуге хазырланыуну юсюнден баргъанды. Комиссияны башчысы, Иванов областьны Думасыны таматасы Марина Дмитриева сабийлени солууларын къуралыулу бардырыу битеу субъектлеге да магъаналы болгъанын чертгенди. «Комиссия анга не заманда да энчи эс бурады»,-дегенди ол. Комиссия регионланы бу жаны бла амалларын сюзген эди, жыйылыуда уа аны эсеплери ачыкъ этилгендиле. Былтыр къыралда сабийлени солууларын къурау бла 38 минг организация кюрешгенди. Ол а аны аллында жылдан мингнге асламды. Сабий лагерьледе бла базалада 5 миллион сабий солугъандыла, аланы арасында 1,5 миллиону къыйын жашау болумгъа тюшген юйюрледендиле. Коронавирус бла байламлы чекле кетерилгенден сора солуу организациялада жерле барысы да хайырланылгъандыла. «Путёвкалагъа сейир РФ-ни Правительствосу сабий солуугъа къоранчланы бир кесегин артха къайтарыу жаны бла буйрукъну къабыл кёргенден сора бютюнда ёсгенди. Былтыр белгиленнген программаны онглары бла 800 минг адам хайырланнгандыла. Алагъа къайтарылгъан ахчаны ёлчеми 10 миллиард сомдан озгъанды»,-деп билдиргенди Марина Дмитриева. Ол айтханыча, бир-бир лагерьледе солуу сменала ючден бешге дери кёбейтилгендиле. Энтта бир магъаналы башламчылыкъ, тийишли мадарла толтурулуп, былтыр 55 минг сакъат эм саулукъларына кёре чекленнген онглары болгъан 96 минг сабий саулукъларына бакъдыралгъандыла. «Инклюзив сменаланы былтыр къыралны 73 регионунда къурагъандыла. Быйыл а аланы битеу субъектледе да бардырыргъа белгиленеди»,-деп къошханды докладчы. Регионлада жай солуу кезиуге хазырланыу иш къуралыулу бардырылгъаны, организацияланы тизмелери дайым да жангыртылгъанлары айтылгъанды. Быйыл а лагерьледе санитар-эпидемиология излемле, терроризмге эм от тюшюулеге къажау законла къалай сакъланнганларына энчи эс буруллукъду. Жыйылыуда Томск областьны Законла чыгъарыучу думасыны башчысы Оксана Козловская эм Ненец автоном областьны Депутатланы жыйылыуларыны таматасы Александр Лутовинов да сёлешгендиле. Ахырында Комиссияны 2023 жылда ишини планы къабыл кёрюлгенди.
Поделиться:
Читать также:
26.04.2024 - 17:52 →
Нальчикде жууукъ заманда биринчи ИТ-парк къураллыкъды
24.04.2024 - 17:32 →
КъМР-ни Башчысы Казбек Коков Нальчикде ишлене тургъан поликлиниканы жокълагъанды
22.04.2024 - 08:30 →
«Депутатха туугъан журту ючюн къайгъыргъан адамла келедиле»
16.04.2024 - 12:39 →
Биринчи поликлиника жылны экинчи жарымында хайырланыргъа берилликди
12.04.2024 - 08:57 →
Жаш адамлагъа – не жаны бла да онгла
|