Миллет газетни кючю уллуду

 Газетни тиражын сакълау эм анга жазылгъанланы санын ёсдюрюу редакцияда ишлегенлени не заманда да магъаналы жумушларындан бири болгъанды. Белгилисича изданияны бетлери кюн сайын жангы жигитлени  «излегенлей» турадыла. Ол иш тийишлисича бардырылмаса, окъуучуларыбызны саны тюшериги эм шуёхларыбыз да  азая барлыгъы баямды.

Окъуучуларыбызны саны бла быйылгъы жылгъа къаллай кёрюмдюле бла киришдик  деген соруулагъа газетибизни электрон амал бла окъугъанла да излей болурла. Быйыл тиражыбыз, озгъан кезиу бла тенглешдиргенде, 190 экземпляргъа ёсгенди. Битеу да  быйылгъы жылны биринчи жарымына 1673 адам жазылгъанды. Бирси изданияла -«Кабардино-Балкарская правда», «Адыгэ псалъэ»- бла тенглешдиргенде,  аладан  эсе жюз бла жарым эм жюз экземпляргъа алдабыз.    

 Электрон газетибиз да айныйды, ыйыкъгъа беш кере жангыртылады, шабат эм солуу кюнледе да официал сайтыбызгъа материалланы  салабыз.

Жазылыу ишибизге  окъуучуларыбыз  да тири къатышхандыла, сау болсунла. Озгъан кезиудеча,  эм уллу кёрюмдю Нальчикни почта бёлюмлериндеди. Башхача айтханда, шахарны тийресинде болгъан 19 почта бёлюм 178 экземпляр къошхандыла тиражыбызгъа.  Огъары Малкъарда газетни шуёхларыны саны 149 –гъа жетгенинде белгилерчады. Тырныауузну тёрт бёлюмюнде да аллай бир адам жазылгъанды.  Энди Кёнделенни эки бёлюмюнде 138 адам аллыкъды газетни. Ол да айныуду элге. 

Къалгъан эллерибизни юсюнден айтханда, хал былайды:  Бабугент-106, Хасания -89, Тёбен Чегем-89,  Къашхатау-68, Булунгу-66, Акъ-Суу – 54, Герпегеж -52, Яникой - 51, Ташлы- Тала-37,  Лашкута-30, Быллым - 25, Жангы Малкъар-20, Жанхотия-21,  Элбрус-20, Хабаз-18, Кичибалыкъ-29, Къара-Суу-17, Огъары Бахсан -15, Бызынгы-16, Огъары Жемтала-11, Бедик-7, Биринчи Чегем эм Экинчи Чегем-18,  Кенже-13, Хушто-Сырт-13, Шалушка-9,  Жемтала-6, Терс-Къолда бла Аушигерде тёртюшер  адам жазылгъандыла газетге. Биришер, экишер, ючюшер газет алгъан министерствола, ведомствола эм тюрлю-тюрлю биригиуле да бардыла.

Кёрюмдюлени юсюнден айта, тираж иги кесекге ёсген эллени- Огъары Малкъарны, Бабугентни, Кёнделенни, Тырныауузну, Хасанияны, Тёбен Чегемни почта бёлюмлеринде ишлегенлеге ыразылыгъымы билдирирге сюеме. Артыкъда Огъары Малкъарны почтасыны таматасы Темукулланы Аминат, ол уллу элибизде жашагъанлагъа газетибизни магъанасын ангылатып, жызылыугъа иги къошумчулукъ этгенди.  Дагъыда Тырныауузну бла Къашхатауну почта бёлюмлерини  таматалары Афашокъланы Руслан бла Гажонланы Асият тиражыбызны  ёсерине уллу къыйын салгъандыла. Ол ишни таза жюреклеринден, миллет газетни энчилигин эм магъаналылыгъын билип бардырадыла, окъуучуларыбызгъа да ангылатадыла. Белгилерчады: гитче эллерибиз  газетге жазылыу бла ахшы кёрюмдюле болдургъандыла. Герпегежни, Ташлы-Таланы эм Булунгуну почталарында ишлегенлени -Бёзюланы Аминатны, Таукенланы Сакинатны, Акъайланы Фатиматны -атларын сагъыныргъа тийишли кёреме.  

Жазылыу кампания хар жерде бирча бардырылмайды, аны магъаналылыгъын ангылагъан элледе кёрюмдюле игидиле. Газетни ишчилери да эллеге айланыр ючюн къалмайдыла. Белгили журналистле Холаланы Марзият , Мусукаланы Сакинат, Османланы Хыйса эм башхала окъуучуларыбыз бла элледе тюбешедиле. Алада жашагъан кёп сабийли юйюрлени, белгили эм фахмулу адамланы, къол усталаны, иш къурап баш кечиндиргенлени, жер -жерли администрацияланы, мектепледе ишлегенлени, айырмалы жаш тёлюбюзню юслеринден тохтамагъанлай материалла хазырлайдыла, биз аланы газетни бетлеринде бергенлей турабыз. Эллерибиз бла байламлыкъны юзмезге кюрешебиз, анда жашайдыла бизни окъуучуларыбызны асламысы, аладыла газетни бетлерини жигитлери.  Мындан ары да ол ишге аслам эс буруллукъду.  

Энди жазылыу кампаниягъа себеплик этгенлени бир къауумуну атларын сагъыныуну тийишли кёреме. Къырал Думаны депутаты Геккиланы Заургъа, КъМР-ни жарыкъландырыу эм илму министри Анзор Езаов, КъМР-ни табийгъат байлыкъла эмда экология министри Шауаланы Илиясха,   КъМР-ни курортла эм туризм министри Мурат Шогенцуковха, КъМР-ни урунуу эмда социал къоруулау министри Асанланы Алимге,  Сюд  приставланы федерал службасыны КъМР-де управлениясыны таматасы-республикада баш сюд пристав Бауаланы Ахматха,  Черек районну администрациясыны башчысы Къулбайланы  Аланнга, Элбрус  районну администрациясыны башчысыны къуллугъун толтургъан Сотталаны Къурманнга,  «Нальчик» Банкны оноучусу Эндрейланы Борисге. Республикалы клиника больницаны баш врачыны орунбасары Къудайланы Шамил, КъМР-ни саулукъ сакълау министерствосуну сюд медицина экспертиза бюросуну таматасы Мечукъаланы Алийханнга, «Ахмат и К» биригиуню таматасы Геграланы Азаматха  бла баш бухгалтери Белла Бойцовагъа, миллет газетге къайгъыргъанлары ючюн, уллу ыспас этеме.

 Огъары Малкъарны экинчи номерли мектебини директору Жангоразланы Борисге,    Черек, Чегем эм Элбрус районлада электросетьлени таматалары Жангоразланы Хасаннга, Жаболаны Маратха эм Хапаланы Юсюпге, РФ-ни МВД-сыны Черек эм Элбрус район бёлюмлерини таматалары Хапаланы Далхат бла Шауаланы Арсеннге,    Элбрус районну Халкъны социал жаны бла жалчытыу комплексли арасыны директору Этезланы Мажитге, Элбрус районну Социал жаны бла къоруулау эм иш бла жалчытыу арасыны таматасы Мырзаланы Замратха, Элбрус районну Жол мюлк управлениясыны  таматасы Ахматланы Мурадиннге,  МВД-ни Элбрус эм Черек районлада бёлюмлерини таматалары Оракъланы Рустамгъа  бла Къазакъланы Тахирге , «Приэльбрусье» Миллет паркны таматасыны орунбасары Чочайланы Малик, Бичеккуланы Алим бла аны юй бийчеси Ёлмезланы Ибрагимни къызы Лейла эм  башхалагъа жазылыугъа  уллу себеплик этгенлери ючюн жюрек ыразылыгъымы билдиреме.

  «Къайсыннга 100 атлам» тарых, маданият эсгертмелени сакълаугъа болушлукъ этиу фондну таматасы Тетууланы Хадис, социал сетьледе жазылыу кампанияны баргъаныны юсюнден жамауатха билдирип, аны кёрюмдюлери иги боллугъуна ахшы себеплик этгенди.  Миллетни иши бла байламлы соруулагъа халкъ уллу кёллю болмазгъа кереклисин энчи чертгенди ол. 

Сагъынылгъанланы барысы да тамамлагъан жумушлары бла малкъар халкъны маданият хазнасын, ана тилин сакъларгъа, айнытыргъа къошумчулукъ этедиле. Ол ишни юсюнде миллет газетни къаллай бир кючю болгъанын иги ангылайдыла.

Газет миллетни энчилигини баш белгилеринден бириди. Мындан арысында да «Заман» сизни керти шуёхугъуз, огъурлу сёз нёгеригиз болур деп ышанама.