Муртазланы Борис РФ-ни МВД-сыны Черек районда бёлюмюню жангы таматасы бла танышдыргъанды

Ючюнчю июльда ыйыкъ сайын бардырылыучу жыйылыуда Черек районну администрациясыны башчысы  Муртазланы Борис  кенгешге къатышханланы Россейни МВД-сыны Черек районда бёлюмюню жангы таматасы, полицияны подполковниги Къартлыкъланы Музафарны жашы Зейтун бла танышдыргъанды. Жангы оноучугъа Муртаз улу, жетишимле тежеп, бирге ишлеуню баш магъаналы борчларын туура этгенди, деп билдиргендиле Черек районну администрациясыны пресс-службасындан. 

Тюбешиуге къатышхан эл таматала жангы къуллукъчуну алгъышлагъандыла эмда анга не жаны бла да билеклик этериклерине ышандыргъандыла.

Къартлыкъланы Зейтун ары дери Россейни МВД-сыны Чегем районда бёлюмюне башчылыкъ этгенди. Черек райондагъы бёлюмню алгъыннгы башчысы Хапаланы Далхат а КъМР-де МВД-ни Экстремизмге къажау кюреш бардырыу жаны бла арасыны бёлюмюню таматасына салыннганды.