Россейде Жангы жылны белгилеп къачан башлагъандыла?Бюгюнлюкде Жангы жыл 31 декабрьде белгиленеди. Адамланы асламысы анга алгъадан хазырланып башлайдыла - аш-суу хазырларча продуктла, саугъала аладыла, къайда эм къалай этериклерин тохташдырадыла, бир бирге къонакъгъа жюрюйдюле, майданда жасалгъан назыгъа эм салютлагъа къараргъа барадыла… Биринчи источниклеге кёре, Жангы жылны байрамын тёрт минг жыл мындан алгъада Вавилонда белгилегенлери айтылады. Бизни эрагъа дери Месопотамияда, Римде, Египетде эм башха жерледе да анга къууанч бла тюбегендиле. Ол жаз башына табийгъат жашнап башлагъан кезиуге тюшгенди. Оруслула да 988 жылда христиан динни алгъанларындан сора байрамны биринчи мартда белгилегендиле. Болсада 1492 жылда ол биринчи сентябрьге кёчюрюлгенди. Алай бла 1699 жылда Пётр I Европаны юлгюсюнде Жангы жылны 31 декабрьде белгилерча буйрукъ этгенди. Ол санда юйледе бла арбазлада назы терекни бутакъларын салып эм жасап башлагъандыла. Аны патчах немис слобода жашагъан тыш къыралчылада кёргенден сора жаратып, жангы адетге чыгъаргъанды. Эсге сала айтсакъ, немислиледе назы терек тауусулмазлыкъ жашауну белгисиди, алай оруслулада уа ёлюкню ашырыу бла байламлы адетде хайырланылгъанды. Ол себепден биринчи заманда жамауат жангычылыкъланы иги ангыламагъанды. Жангы адетлеге кёре, шахарчыла бир бирлерин Жангы жыл бла алгъышлагъандыла. Бир ыйыкъны байрамны белгилегендиле, кече жарыкъ болурча отла жандыргъандыла. Къууанчланы кёбюсю уа Къызыл майданда ётгенди. Мында отла тизгендиле, юч кере ушкокладан атдыргъандыла эм кёкге ракетала (питардала, салютла) жибергендиле. Патчах ауушхандан сора, жамауат алгъынча кенг белгилемегенди. Къууанч жыйылыула кёбюсюнде байла бла бийлени юйлеринде ётгендиле. Ол санда Елизавета I заманында бал-маскарадла башланнгандыла. Анга къолайлы юйюрледен онбеш мингден аслам адам къатышыргъа окъуна болгъанды. Екатерина II троннга олтургъанда, Жангы жылда бир бирге саугъала берип, омакъ жасалгъан байрам тепсеуле къурап, шампан ичип, назы терекни жасап, открыткаланы саугъалап башлагъандыла. Алай бла 1852 жылда Россейде биринчи кере назы терекни тёппесине жулдуз да салыннганды. Ол адет 1513 жылда немисли Мартин Лютер башламчылыгъы бла беш мюйюшлю жулдуздан алыннган юлгюдю. Анга бусагъатда Вифлеем жулдуз дейдиле эм Рождествону баш шартына санайдыла. Аны бла байламлы бир къауум таурух да жюрюйдю. Революциядан сора 1918 жылда большевикле жангы Европаны григориан орузламасына кёчгендиле. Тюрлениулеге кёре, юлиан орузламадан онюч кюн алгъа баргъанды. Аны ючюн Эски жангы жылны байрамын белгилерге тюшгенди. Андан сора да, 1920 жыллада къыралда дин бла байламлы шартла къурутула башланнгандыла эм 1929 жылда Совнаркомну бегими бла Рождествону арталлыда кетергендиле эм ишчи кюн этгендиле. 1935 жылда СССР-ни ЦИК-ини Президиумуну келечиси Павел Постышев «Правда» газетде Жангы жылны революциягъа дери буржуазия бла къуллукъчула жаланда кеслерини сабийлерине бардырыучуларын, энди уа Совет халкъны сабийлерине школлада, садикледе, яслиледе, пионерлени майданында, сабий клублада бардырса иги боллугъун кётюргенди. Бир къауум замандан 1937 жылда Христосну орунуна байрамны баш жигитине Къарт аппа сайланады. Анга европалы сыйлы Николайны, фольклорда айтылгъан Морозну эм огъурлу аппаныча Ленинни сыфатлары берилгендиле. Союзланы юйюнде баргъан Жангы жыл байрамында Къарт аппаны туудугъу эм болушлукъчусуча Къар къыз да къошулады. 1954 жылда Кремльде сабийлеге къыралны баш назысыны байрамы ётгенди, 1964 жылда уа телеэкранлагъа «Голубой огонёк» передача чыгъады. Къыралны Башчысы Леонид Брежневни башламчылыгъы бла халкъны Жангы жыл бла алгъышлау адет кийириледи. Аны бла бирге байрам тепсилени бусагъатда белгили «оливье», «селёдка под шубой» салатла, мандаринле, шампанское бла жасагъан тёреге айланады.
Поделиться:
Читать также:
03.05.2024 - 09:41 →
Урунуу магъанасын тас этмейди, жашаууну мурдору болгъанлай къалады
02.05.2024 - 16:14 →
Аммаларыбызны сюйген оюнлары
27.04.2024 - 13:00 →
Къадар болмаса…
26.04.2024 - 18:34 →
Жерине кёре мекямы
26.04.2024 - 09:04 →
Аммаларыбызны сюйген оюнлары
|