Миллет проектле республиканы жашауун тюрлендиргендиле

Россейде «Демография», «Саулукъ сакълау», «Билим бериу», «Туризм эм къонакъбайлыкъ индустрия», «Гитче эм орталыкъ предпринимательство»,  «Жашау журт эм шахарлада болум», «Культура», «Экология», «Качестволу эм къоркъуусуз жолла» эмда башха миллет проектле бардырыладыла жашауда. Ала Россейде не жаны бла да къолайлы мадарла жалчытыр,   инсанлагъа ырахматлы жашау болумла къурар мурат бла жарашдырылгъандыла. Къабарты-Малкъаргъа уа быйыл миллет проектлени тамамлаугъа 13 миллиард сом бёлюннгенди, бу ахчагъа артыкъда магъаналы жумушла тамамланнгандыла.

Сёзге, быйыл республика «Саулукъ сакълау» миллет проектни 7 программасына эмда «Демография» миллет проектни 2 федерал программасына къатышады. Аланы чеклеринде медицина учрежденияланы ырысхы-техника болумларын игилендириу, медицина жумушланы айнытыу жаны бла мадарла толтуруладыла. Жылны аллындан бери озгъан 9 айны ичинде уа бу жумушлагъа 1 миллиард 526 миллион сом къоратылгъанды.

 Сфераны ырысхы-техника болумун игилендириу жаны бла магъаналы жумушла толтурулгъандыла. Республикалы кёп профильли сабий араны эки мекямы тынгылы жангыртылгъандыла. Бу жумушлагъа Россейни Правительствосуну резерв фондундан 125 миллион сом бёлюннгенди. Республикалы бюджетден да 75 миллион сом къошулгъанды.  Бу ахча больницаны экинчи корпусун жангыртыугъа къоратыллыкъды – алгъын анда перинатал ара орналгъанды. Саулукъ сакълауну биринчи бёлюмюн тынгылы жангыртыуну программасыны чеклеринде амбулаторияла ишлетиледиле, Нальчикде поликлиниканы къурулушу башланнганды, Элбрусда участка больница ишлетиледи. Онкология араны жангыртыргъа мурат барды. Битеу бу жумушла халкъны саулугъун игилендириу борчланы тамамларгъа онг берликдиле.

2025 жылгъа дери Октябрьское, Жемтала, Акъ-Суу, Кенже, Звёздное, Огъары Черек, Куба-Таба, Красносельское, Светловодское эм Дейское элледе амбулаторияла ишлетирге белгиленеди. Энтта он элде уа аланы мекямлары тынгылы жангыртыллыкъдыла.

«Билим бериу» миллет проектни чеклеринде уа  инфраструктура тюрлениуле бардырыладыла. Сёзге, быйыл 6 школ  ишлетилгенди,  энтта 10-суну къурулушу бардырылады. Аладан ючюсюн быйыл битдирирге белгиленеди. Аны бла бирге билим бериу учрежденияла жангыртыладыла. 2026 жылгъа дери битеу да бирге 176 мекямны тапландырыргъа белгиленеди. Битеу бу жумушланы республикада сабийле  бир сменнге окъурча мадарлагъа бурулупдула.

 «Шёндюгю школ» проектни чеклеринде уа 2023-2024  жыллада «Точка роста» билим бериу жаны бла 60 араны къураргъа белгиленеди.

Культура миллет проект да тюрлендиргенди республиканы жашауун. Аны болушлугъу бла  Ташлы-Талада бла Александровскаяда маданият юйле жангыртылып бошагъандыла. Жылны ахырына дери Камлюково эм Урван элледе ДК-лада бардырылгъан тапландырыу жумушланы ахырына жетдирирге белгиленеди. Озрекде маданият юйню  уа 2023 жылда бошарыкъдыла – мында жангыртыу жумушла эки жылгъа белгиленнгендиле. Дагъыда муниципалитетледе   3 библиотекагъа жангы китапла берилгендиле, келир жыл быллай жумушла энтта 4 библиотекада тамамланырыкъдыла.

Келир кезиуде сфераны ырысхы-техника базасын игилендириу, хар элни да культура объектле бла жалчытыу, алагъа керекли оборудование келтириу, элледе шёндюгю излемлеге келишген культура болумланы къурау ишни андан ары тамамларгъа тийишлиди.

«Экология» миллет проектни челеринде уа    Тырныауузда   вольфрам-молибден комбинатны къалгъан-къулгъанларын тазалау жаны бла мадарла толтуруладыла. 2030 жылгъа дери уа регионлада  кир-кипчикни жыйыуну, аны жангыдан хайырланыуну системасын къурау жаны бла борчла салыннгандыла.