Токну хайырланыу ёсе барады

Электросетьледе къоранчланы азайтыуну, алада ремонт ишлени бардырыуну, ток ючюн тёлемей тургъанланы жууапха тартыуну юсюнден сёлешгендиле «Каббалкэнергода» бардырылгъан кенгешде. Аны ишине районланы электросетьлерини башчылары да къатышхандыла, деп билдиргендиле компаниядан.

Жыйылыуда айтылгъаннга кёре, быйыл ал беш айны ичинде, озгъан жылны бу кезиую бла тенглешдиргенде, токну хайырланыу 6 миллион киловатт-сагъатха кёбейгенди. Ол а сетьлеге жангы хайырланыучула къошулгъанын, асламыракъ бытовой эмда производстволу техника ишлеп башлагъанын кёргюзтеди. Аны юсюне, жылыула келгени бла, кондиционерле кёп ток кюйдюрюп башлайдыла, эл мюлк сферада уа, ол санда иели мюлкледе да, сабанланы, теплицаланы, бахчаланы сугъарыу системала къошуладыла.

«Бу айланы ичинде 655 миллион киловатт хайырланылгъанды. Алгъадан эсе Зольск (+1,5 млн. квт.), Май (+1 млн. квт.) эмда Чегем (+850 минг квт.) районлада асламыракъ ток кюйдюрюлгенди. Ол иги шартды, алай аны бла бирге къоранчлагъа да къошулмазча бек сакъ болургъа керекди», - деп белгилегенди компанияны башчысы Муртаз Каров.

Кенгешде районлада бёлюмлени тамата инженерлери, Ростехнадзорну келечилерин да къошуп, хайырланыучулада болгъан эки минг трансформатор подстанцияны тинтирге кереклисин айтхандыла, ток сетьлеге эркинликсиз къошулгъанлагъа жууаплылыкъ къатыланнганын, тазирлеге къошулгъанын да сюзгендиле.