Къабарты-Малкъар отлукъ бериу кезиуге хазырланады

Бюгюн КъМР-ни Башчысы Казбек Коков 2022-2023 жыллада отлукъ бериу кезиуге хазырланыу бла байламлы жыйылыу бардыргъанды. Жыйылыугъа КъМР-ни Башчысыны Администрациясыны оноучусу Мухамед Кодзоков, КъМР-ни къурулуш, жашау журтла-коммунал мюлк министри Алим Бербеков, Тарифле эм журтлагъа надзор этиу жаны бла къырал комитетни таматасыны къуллугъун толтургъан Алим Макуашев, «Газпром газораспределение Нальчик» акционер обществону оноучусу Залим Вороков къатышхандыла.

 Отлукъ бериу заманнга дери 2584 кёп фатарлы юйню хазырларгъа керекди. Бюгюнлюкге отлукъ берген кезиуге жашау журт фонд 60 процентге хазырды.

Жашау журтла-коммунал мюлк жаны бла специалистле котельнялада профилактика ишлени бардырадыла, бюгюнлюкде аланы 389 отлукъ бериу кезиуге хазырды. Битеу да жылыу баргъан быргъыланы узунлугъу  476 километр болады. Республиканы оноучусу баш кюннге профилактика ишлени тамамлап бошаргъа болжалларын белгилерге кереклисини юсюнден  буюруу бергенди. 

Андан сора Нальчикни эм республиканы районларында юйлеге жылыу берген предприятияларыны ишлерин къыйматлы этерча соруула сюзюлгендиле.

 Казбек Коков жууаплы ведомстволагъа юйлеге жылыу эм жылы суу берген соруулагъа уллу эс бурургъа, ол санда жер-жерледе жашагъан адамла бла байламлыкъны юзмегенлей, аладан келген билдириулеге заманында  къайгъырыргъа кереклисин чертгенди, деп билдиргендиле КъМР-ни Башчысыны бла  Правительствосуну пресс-службасындан.

Бизни корр.