Битеу эл бирча къатышып

Булунгучула быйыл Къурман байрамны бир заманда да болмагъанча жарыкъ эмда къуралыулу бардыргъандыла. Анга битеу эл бир кибик къатышханды. Аланы араларында элни сыйлы акъсакъаллары, ёсюп келген тёлюсю  эмда  Украинада баргъан энчи аскер операциягъа  къатышып къайтхан махтаулу жашларыбыз, шахардан, къоншу элледен да къонакъла келгендиле. 

Жаш адамла  спорт оюнланы бардыргъандыла,  чаришде эришгендиле, жарыкъ миллет тепсеуледе аякъ бюкгендиле. Жашаулары келгенле уа,  жапма тюбюнде олтуруп, алагъа къарагъандыла. 
Байрамны элни администрациясыны башчысы  Мушукаланы Мухтар бла къолайлы жашла  Байсолтанланы Къаншау, Сарбашланы Жамал  да къурагъандыла. Ала, уллу тууар союп, хантлы къангала да жарашдыргъандыла. 

Чаришде хорлагъанла саугъала бла  белгиленнгендиле. Аланы башда сагъынылгъан жашладан сора да Мызыланы Аныуар да    бергенди.            

Биринчи жерге Къалабекланы Алий чыкъгъанды. Анга  байрамны къурагъанла саугъагъа  къумалы ат бергендиле. Экинчи жер Этезланы Рашидге жетгенди, ол  ат иер къоллу болгъанды. Ючюнчю болуп   Мусукаланы Солтан келгенди, анга уа телевизорну саугъа этгендиле.

Сёзсюз,  аскер борчларын Украинада намыслы толтуруп къайтхан жашла да  сыйланнгандыла,  кёп ыспас сёзле да эшитгендиле.

Ачыкъ кёкню тюбюнде, ариу талада байрамны бютюн жарыкъ, бютюн къууатлы этер ючюн,  элли жашла Кётенчиланы Жамболат, Мызыланы Зейтун, Сарбашланы Аскер, Мызыланы Мурадин да фахмуларын аямагъандыла.