Бу кюнледе газетлеге бла журналлагъа жазылыу ахырына жетгенди. Белгилегенибизча, бу жол да хурметли окъуучуларыбызны хайырындан ол жумуш тийишли халда ётгенди. Аны бла байламлы эм Почтачыны кюнюню аллында биз «Заман» газетни редакциясыны атындан эм иги кёрюмдюле болдургъан бир ненча почтачыгъа ыразылыгъыбызны билдирип, аланы саугъалагъанбыз. Ала Огъары Малкъарны почтасыны таматасы Темуккуланы Аминат, Нальчик почтаны Элбрус участкасыны баш специалисти Афашокъаланы Руслан эмда Тёбен Чегемни почтасыны таматасы Байсолтанланы Лейладыла.
Аминат бла Руслан редакцияда къуралгъан къууанчлы жумушха къатышалмагъандыла, Лейла уа сыйлы къонагъыбыз болгъанды. Сагъынылгъан къауумгъа эм бирси тири ишлеген почтачыларыбызны барысына да жюрек ыразылыгъыбызны билдиребиз эмда ахшы байламлыкъларыбыз мындан арысында да къуралыулу болуп турлукъларына ийнанабыз.
Байсолтанланы Лейланы юсюнден айтханда, ол «Россейни почталары» АО-ну Тёбен Чегемдеги бёлюмюнде уруннганлы 35 жыл болады. Кеси Булунгуда туугъанды, Беппайланы Борис бла бир юйюр къурагъан жылларында ол замандагъы почтаны таматасы Шауаланы Радимхан солуугъа кетерге сюйюп, кесини орунуна аны къойгъан эди ишде. Анча жылны ичинде Лейла бир жерде, почтада, бет жарыкълы урунады, ол кезиудеги сайлаууна, кеси айтханына кёре, шёндю да сокъуранмайды.
Былай алып къарагъанда, насып неден къуралады деген сорууну жууаплары кёпдюле. Аладан бири, сёзсюз, адам кеси жерин табып, алайда жамауатха хайыр келтирип, къыралына, элине-жерине жарап турууду. Бизни бюгюннгю жигитибиз да ол къауумданды. Андан сени ишге кёллендирген не затды деп соргъанымда, ол къайын анасы Беппайланы Нашурумханны, анасы Аппайланы Аминатны (жаннетли болсун) сагъынады. «Ала экиси да, - дейди ол, - мени кёп затха юйретгендиле. Биринчиден а, не заманда да адамла бла келишиулюкге, жарашыулукъгъа, тёзюмлюкге эмда тутхан ишинги тийишлисича толтурургъа, жарты жолда къалмазгъа, жарты ишни къоймазгъа».
Ол эки огъурлу тиширыуну жашау дерслерин Лейла бюгюнлюкде сюйген ишинде толу хайырланады, ала юйретген жорукълагъа отуз жылдан артыкъны табыннганлай келеди. Эллиле бла ишлеген, не жашырлыгъы барды, бирде къыйыныракъ, башха заманда тынчыракъ да бола болур. Аланы хар бири бла бир тилли болуп, жарсыуларын, къууанчларын, излемлерин ангылап, къайгъырып, тийишлисича болушуп турургъа Байсолтанланы къызларыны, насыпха, къолундан келеди. Ол жетишимлери ючюн аны бир ненча къырал саугъасы болгъанын да ол кеси, чынтты таулу тиширыуча, иймене, уяла сагъынады.
Тёбен Чегемни почтасында бюгюнлюкде Габоланы Нажабат, Байтуугъанланы Наталья, Гочаланы Мадина (ол шёндю сабийге къарагъан отпускдады) ишлейдиле. Аланы хар бири, Лейла белгилегенича, кеслерини ишлерин тынгылы билген, адамгъа жараргъа итиннген, жарыкъ адамладыла. Аны себепли ушакъ нёгерим биргесине уруннган къызлагъа, болушлукъ тапдыргъанлары, тутхан жумушларына сууукъ кёзден къарамагъанлары ючюн ыразылыгъын къатлап-къатлап билдиреди, биз да аны ол сёзлерине къошулабыз.
Почтаны харкюнлюк ишини юсюнден сагъыннганда уа, анда кёп жумуш тындырылгъанын айтыр кереклиси да болмаз. Эллиле, башха журтладан келгенле да боладыла, ала ЖКХ тёлеулерин этедиле, посылкала аладыла, жибередиле, письмола бла байламлы иш толтурулады, пенсияла, социал ахчала юлешинедиле, жазылыу кампанияла бардырыладыла, сатыу-алыу жумушла да тамамланадыла.
Газетге жазылыуну юсюнден айтханда, ушакъ нёгерим Тёбен Чегемде бек кёп болмасала да, алай аны алыргъа сюйгенле уа бардыла, дейди. Лейла аны алгъан, окъугъан эллиле бек ыразы болгъанларын да энчи чертип, кёлю жарып белгилейди. Аны бла бирге эллилерини ахшы, къууанчлы жумушларын, башха оюмларын газетге билдирмеген, телефон бла окъуна сёлешип айтмагъан шартларына жарсыйды.
- Бюгюнлюкде «Заман» газетибизни магъанасы болмагъанча уллуду. Аны хар таулума деген инсан алыргъа тийишлиди. Театрыбыз, радиобуз, телевидениябыз, журналларыбыз да бардыла, насыпха, алай хар кюнден да арбазынга кирген, къолунга тюшген къагъытда жазылгъан малкъар тилде сёзню багъасы уа жокъду. Ол къуру бизни къыйматыбыз тюйюлдю, тамблагъы кюнюбюзде сабийлерибизни да къыйматыды, тарыхыды, аны себепли анга сакъ болургъа, сыйын бийикде тутаргъа борчлубуз,- дейди эл почтаны таматасы.
Лейланы сёзлери эшитгеннге, ангылагъаннга бек магъаналыдыла. Халкъны жырын жырласанг, халкъ да эжиуюн этер деп айтылынады буруннгу нарт сёзде. Бизни «Заман» газетибиз а не заманда да халкъны жарыкъ жырын айтханды, сыйлы, хурметли, ёхтем миллетибиз да ол жырны эжиуюн этгенлей тургъанды эм турады. Аны ючюн хар инсаныбызгъа, хар окъуучубузгъа ыразылыгъыбызны билдиребиз. Байсолтанланы Лейланы, аны биргесине ишлегенлени, битеу да почтачыланы уа, профессионал байрамлары бла алгъышлап, тутхан ишлеринде бийик жетишимле тежейбиз.
