Фахмулу алим бла сейир эм хайырлы тюбешиу

КъМКъАУ-ну агрономия факультетинде  Н. И. Вавилов атлы Битеуроссей институтну битимлени генетика ресурслары бёлюмюню алчы илму ишчиси, биология илмуланы доктору Эдуард  Хатефов бла тюбешиу болгъанды. Ол университетни келечилерине эмда студентлеге нартюхню  жангы тюрлюлерин чыгъарыуну шёндюгю амалларыны  юсюнден лекция окъугъанды, деп билдиргендиле вуздан.

Эдуард Балилович кеси заманында бу вузну  сагъынылгъан факультетин тауусханды. Докладында ол нартюхню тирликлилигин не затла кётюргенлерин туура этгенди, эм башына уа хауаны жылылыгъын салгъанды. Ызы бла жыйылгъанланы бу битимни  талай сортларыны энчиликлери бла да шагъырейлендиргенди эмда шёндюгю селекция илму къайсы жаны бла айный баргъанын билдиргенди.

Алим  айтханнга кёре,  нартюхню заранлы къурт-къумурсхалагъа эмда ауруулагъа чыдамлы сортларын чыгъарыугъа баш магъана бериледи. Аны бла бирге илмуда жетишимлени хайыры бла бу гибрид тюрлюлерин  ёсдюрюрге болады. Аны айтханда, докладчы восковидный нартюхню хайырланыу битеу дунияда бек терк ёсюп баргъанын белгилегенди. Бу сорт жаланда аш-азыкъ промышленностьда угъай, нефть чыгъарыуда, медицинада, экология жаны бла таза (пластик) адырла жарашдырыуда да жетишимли хайырланады, дегенди.

Окъуучула лекциягъа бек сюйюп тынгылагъандыла. Университетни илму-излем иш жаны бла проректору Анзор Езаов да Эдуард Хатефовха ыразылыгъын билдиргенди. Дагъыда, ол айтханнга кёре, жууукъ кезиуледе КъМКъАУ-ну бла Н. И. Вавилов атлы Битеуроссей институтну арасында тийишли байламлыкъла къураргъа умут барды.

Студентлени уа Анзор Езаов ол илму учреждение берген онгланы толуракъ хайырланыргъа, окъууда да тирирек болургъа чакъыргъанды.

Эдуард Балилович а селекционерни иши къыйын, алай дагъыда бек сейирли болгъанын белгилеп, бир талай кезиуню Къытайда уруннганын, кесек замандан а ишлерге Африкагъа барлыгъын да билдиргенди. Белгили алимни оюмуна кёре, бизни къыралны селекция школуну даражасы битеу дунияда да бек бийикдеди. Къабарты-Малкъарны да барды онглары анга иги къошумчулукъ этерге.

-Биз селекционерлени Прохладна районда «Отбор» фирмада хазырлап башларгъа умут этебиз. Анда жаш алимлени турур жерле эмда аш-азыкъ бла хакъсыз жалчытырыкъдыла. Агровуз да селекция бла кюреширге итиннген студентлеге не жаны бла да себеплик этерге хазырды, - деп белгилегенди алим.