Къыралны кёп регионларыны келечилери - Черек ауузунда

Черек районда бу кюнледе эки магъаналы иш болгъанды: «Тазалыкъдан башлайма жолуму» эмда «Хорламгъа 100 балл» акцияла ётгендиле. Алагьа Россей Федерацияны 62 регионундан 300 адам къатышханды. Ала ЕГЭ-леде 100 балл алып, къыралны бек иги бийик окъуу юйлерине киргенледиле.

Къонакълагъа Черек районну администрациясыны билим бериу управлениясыны таматасыны къуллугъун толтургъан Эфендиланы Тареза эмда миллет кийимле кийген сабийле, къолларында да айрандан толу гоппан эмда локъумла бла тюбегенди. Аланы алгьышлай, администрацияны башчысыны орунбасары Улбашланы Сахадин Къабарты-Малкъарны юсюнден тынгылы хапар айтханды.

Тышындан келгенлеге тийишли къонакъбайлыкъ этилгенди. Сабийле алагьа «Черек район», «Мени Кавказым», «Къабарты бла Малкъар» деген жырланы да саугъалагъандыла . Андан сора уа, битеу этилген муратла толурларыны белгисича, кёкге жюз акъ шар жиберилгенди.

Эколого-биология арада Орус география обществону «ЮнЭк» жаш тёлю клубуну башчысы Гузиланы Хусейин  къонакъланы аланы акцияларына къатышыргъа чакъыргъанды. Ала ол кюн черекге кёп чабакъчыкъ жибергендиле.

Окъууда айырмалыла,  Чирик кёлню жагъасында иги кесекге дери мычып, суратха да тюшгендиле, къарлы таулагьа къарап, таулу хычинле, шишлик да ашап, айран да ичип, зауукълукъ тапхандыла, деп билдиргендиле Черек районну администрациясыны пресс-службасындан.